حزب اللہ کو 2024 میں 15 کروڑ 70 لاکھ ڈالر کے ہتھیار ملے، رپورٹ کے مطابق بڑا حصہ ایران نے دیا
اسرائیلی غیر منافع بخش ادارے Center for Research of Terror Financing (CENTEF) کی ایک نئی رپورٹ کے مطابق حزب اللہ نے 2024 میں تقریباً 157 ملین ڈالر مالیت کے ہتھیار حاصل کیے، جن میں سے تقریباً 129 ملین ڈالر مالیت کا سامان ایران نے مبینہ طور پر براہ راست فراہم کیا،رپورٹ کے مطابق یہ رقم نقد ادائیگی نہیں بلکہ ہتھیاروں اور فوجی سازوسامان کی شکل میں فراہم کی گئی
رپورٹ کے مطابق حزب اللہ نے خود تقریباً 28 ملین ڈالر ہتھیاروں کی خریداری پر خرچ کیے،ان میں چھوٹے ہتھیار، گولہ بارود، ڈرون کے پرزے، دوہرے استعمال کا سامان اور بین الاقوامی خریداری کے نیٹ ورک سے حاصل کیا گیا دیگر فوجی سازوسامان شامل تھا
CENTEF کے تخمینے کے مطابق ایران کی جانب سے فراہم کیے گئے سامان میں راکٹ، میزائل، ڈرون، ٹینک شکن میزائل، فضائی دفاعی نظام، گولہ بارود، راکٹ لانچر، بحری سازوسامان اور دیسی ساختہ بموں سے متعلق آلات شامل تھے
رپورٹ میں دعویٰ کیا گیا ہے کہ 2024 کے دوران حزب اللہ نے تقریباً 4,000 قلیل فاصلے کے کاتیوشا راکٹ، 400 فلق-1 اور فلق-2 راکٹ اور 120 برکان راکٹ حاصل کیے،رپورٹ کے مطابق کاتیوشا راکٹ کی اندازاً قیمت 300 ڈالر اور برکان راکٹ کی تقریباً 400 ڈالر فی یونٹ تھی
CENTEF نے اپنی تحقیق کے لیے کھلے ذرائع سے دستیاب معلومات اور حزب اللہ کے فوجی اثاثوں کی معلوم یا تخمینہ شدہ قیمتوں کو استعمال کیا ہے،یہ اعداد و شمار ایک اسرائیلی ادارے کا تجزیہ ہیں، آزادانہ طور پر تصدیق شدہ مالیاتی حسابات نہیں