بلوچستان میں 4 روز کے دوران 71 دہشت گرد مارے گئے، آئی ایس پی آر
بلوچستان کے مختلف علاقوں میں سکیورٹی فورسز کی کارروائیوں کے دوران گزشتہ 96 گھنٹوں میں 71 دہشت گرد مارے گئے آئی ایس پی آر کے مطابق کارروائیاں زیارت، شابان، نوشکی اور مند سمیت مختلف علاقوں میں کی گئیں
آئی ایس پی آر کے مطابق شابان کے علاقے میں 21 ستمبر سے کارروائی جاری ہے سکیورٹی فورسز نے متعدد مبینہ ٹھکانوں کو کلیئر کیا اور شدید فائرنگ کے تبادلے کے بعد 33 دہشت گردوں کو ہلاک کرنے کا دعویٰ کیا کارروائی کے دوران اسلحہ، گولہ بارود اور دھماکا خیز مواد بھی برآمد کیا گیا
فوج کے شعبہ تعلقات عامہ کے مطابق گزشتہ 72 گھنٹوں کے دوران شابان میں کارروائی مزید تیز کی گئی، جس میں مزید 23 دہشت گرد مارے گئے آئی ایس پی آر کا کہنا ہے کہ علاقے کا بڑا حصہ کلیئر کر دیا گیا ہے اور مقامی آبادی کو دہشت گردوں کے خطرے سے محفوظ بنانے کے لیے کارروائی جاری ہے
اس کے علاوہ 25 ستمبر کو نوشکی میں ایک انٹیلی جنس بنیاد پر کارروائی کے دوران 11 دہشت گردوں کو ہلاک کرنے کا دعویٰ کیا گیا، جبکہ مند میں مزید 6 دہشت گرد مارے گئے اور بڑی مقدار میں اسلحہ اور گولہ بارود برآمد کیا گیا
آئی ایس پی آر نے ان کارروائیوں کو بلوچستان میں جاری انسداد دہشت گردی مہم کا حصہ قرار دیا ہے اور کہا ہے کہ سکیورٹی فورسز اور قانون نافذ کرنے والے ادارے دہشت گردی کے مکمل خاتمے تک کارروائیاں جاری رکھیں گے
آئی ایس پی آر نے یہ بھی الزام عائد کیا کہ پاکستان میں دہشت گردی کے واقعات میں افغان طالبان حکومت اور بھارت کی حمایت شامل ہے یہ الزامات پاکستانی فوج کے مؤقف کے طور پر بیان کیے گئے ہیں
بلوچستان میں حالیہ ہفتوں کے دوران دہشت گردی کے واقعات میں اضافہ بھی ریکارڈ کیا گیا ہے پاکستان انسٹی ٹیوٹ فار کانفلکٹ اینڈ سکیورٹی اسٹڈیز کے مطابق صوبے میں دہشت گرد حملوں کی تعداد جولائی کے 83 واقعات سے بڑھ کر اگست میں 89 ہو گئی، یعنی 7 فیصد اضافہ ہوا