لاہور میں غیر ملکی خاتون سے مبینہ اجتماعی زیادتی، 3 ملزمان کے نام سفری فہرست میں شامل کرنے کی درخواست
لاہور پولیس نے رائیونڈ کے قریب ایک نجی ہاؤسنگ سوسائٹی میں 20 سالہ غیر ملکی خاتون سے مبینہ اجتماعی زیادتی کے الزام میں نامزد 3 مشتبہ افراد کے نام عارضی قومی شناختی فہرست میں شامل کرنے کے لیے وفاقی حکام کو درخواست بھیج دی ہے پولیس کے مطابق خاتون کاروباری مقصد کے لیے پاکستان آئی ہوئی تھی اور جمعہ اور ہفتہ کی درمیانی شب ایک کرائے کے فلیٹ میں مبینہ طور پر زیادتی کا نشانہ بنی
پولیس کے مطابق واقعے کے بعد تینوں مشتبہ افراد لاہور سے فرار ہوگئے پولیس نے ان میں سے ایک کی موجودگی سیالکوٹ میں تلاش کرلی ہے جبکہ گرفتاری کے لیے ٹیمیں مختلف مقامات پر کارروائی کر رہی ہیں پولیس نے ایک مشتبہ شخص کے 2 قریبی رشتہ داروں اور ایک گھریلو ملازم کو بھی حراست میں لیا ہے
ڈی آئی جی آپریشنز فیصل کامران کے مطابق تینوں مشتبہ افراد کی شناخت کرلی گئی ہے اور انہیں گرفتار کرنے کے لیے پولیس کی مشترکہ ٹیمیں کام کر رہی ہیں مقدمے کی تفتیش کرائم کنٹرول ڈیپارٹمنٹ، آپریشنز اور تفتیشی شعبوں کی مشترکہ ٹیم کر رہی ہے پولیس نے مبینہ طور پر واردات میں استعمال ہونے والی گاڑی بھی قبضے میں لے لی ہے
پولیس کے مطابق کینٹ ڈویژن کے ایس پی انویسٹی گیشن عاصم افتخار مشترکہ پولیس ٹیموں کی نگرانی کر رہے ہیں۔ حکام کا کہنا ہے کہ ملزمان کی گرفتاری کے لیے کوششیں جاری ہیں
رپورٹ کے مطابق گزشتہ 4 ماہ کے دوران ڈیفنس سی تھانے کی حدود میں کسی غیر ملکی خاتون سے مبینہ اجتماعی زیادتی کا یہ دوسرا واقعہ ہے، جس کے باعث غیر ملکی شہریوں کی حفاظت اور خواتین کے خلاف جنسی جرائم کی روک تھام کے حوالے سے بھی تشویش سامنے آئی ہے