طوفان نے ایڈ شیرن کا کنسرٹ روک دیا، میکلمور تنازع کے بعد نئی صورتحال
برطانوی گلوکار ایڈ شیرن کے امریکا میں ہونے والے 2 کنسرٹس شدید خراب موسم اور طوفان کی وارننگ کے باعث منسوخ کر دیے گئے یہ کنسرٹس میساچوسٹس کے گِلٹ اسٹیڈیم میں جمعہ اور ہفتے کی رات منعقد ہونا تھے، تاہم منتظمین نے شائقین، عملے اور فنکاروں کی حفاظت کو مدنظر رکھتے ہوئے دونوں پروگرام منسوخ کرنے کا اعلان کیا ٹکٹوں کی رقم خودکار طور پر واپس کیے جانے کی اطلاع دی گئی ہے
یہ منسوخی ایسے وقت ہوئی ہے جب ایڈ شیرن کا دورہ میکلمور کے ساتھ پیدا ہونے والے تنازع کے باعث پہلے ہی شدید توجہ کا مرکز بنا ہوا ہے میکلمور نے ستمبر کے آغاز میں ایک کنسرٹ کے دوران فلسطین کے حق میں آواز اٹھائی تھی، جس کے بعد اسے ایڈ شیرن کے دورے سے الگ کر دیا گیا۔ امریکی اسٹیڈیم مالکان کی جانب سے میکلمور کی موجودگی پر اعتراضات کے بعد معاملہ مزید شدت اختیار کر گیا
میکلمور کا کہنا تھا کہ نیو انگلینڈ پیٹریاٹس کے مالک رابرٹ کرافٹ سمیت بعض اسٹیڈیم مالکان نے واضح کیا تھا کہ اگر وہ دورے کا حصہ رہا تو بعض مقامات پر ایڈ شیرن کے کنسرٹس نہیں ہونے دیے جائیں گے۔ کرافٹ کی جانب سے بعد میں کہا گیا کہ میکلمور کو ہٹانے کا فیصلہ اس کے حالیہ بیانات کے ساتھ ساتھ ماضی میں یہودی برادری کے لیے توہین آمیز سمجھے جانے والے بیانات اور تصاویر سے متعلق خدشات کی وجہ سے کیا گیا
میکلمور کو دورے سے ہٹائے جانے کے بعد ایڈ شیرن کے کئی معاون فنکاروں نے بھی دورے سے علیحدگی اختیار کر لی ان میں فنیاس، بیوگا اور لوکاس گراہم سمیت دیگر فنکار شامل تھے اس صورتحال نے فنکاروں کی آزادی اظہار، فلسطین کے بارے میں عوامی موقف اور موسیقی کے پروگراموں میں سیاسی اظہار کے حوالے سے نئی بحث چھیڑ دی
خود ایڈ شیرن نے بعد میں اس معاملے پر اپنا مؤقف واضح کرتے ہوئے کہا کہ میکلمور کو دورے سے ہٹانے کا فیصلہ ان کا نہیں بلکہ منتظمین کا تھا تاہم 20 ستمبر کو فلاڈیلفیا میں ایک کنسرٹ کے دوران انہوں نے غزہ میں اسرائیلی کارروائیوں کو تباہ کن، ناقابل جواز اور غیر متناسب قرار دیتے ہوئے میکلمور کے معاملے پر معذرت بھی کی
اب گِلٹ اسٹیڈیم کے دونوں کنسرٹس کا منسوخ ہونا ایک ایسے وقت میں سامنے آیا ہے جب ایڈ شیرن کے دورے سے متعلق پہلے ہی سیاسی اور سماجی بحث جاری ہے تاہم منتظمین کے مطابق تازہ منسوخی کی براہ راست وجہ شدید موسم اور حفاظتی خدشات ہیں، نہ کہ میکلمور کے ساتھ پیدا ہونے والا تنازع
