ڈیٹرائٹ میں کملا ہیرس اور السید کی مشترکہ مہم، دونوں کے لیے حمایت بڑھانے اور سیاسی فاصلے کم کرنے کا امتحان
سابق نائب صدر اور 2024 کی صدارتی امیدوار کملا ہیرس اور مشی گن سے ڈیموکریٹک سینیٹ امیدوار عبدالسید 22 ستمبر کو ڈیٹرائٹ میں ایک ہی پلیٹ فارم پر نظر آئے، جہاں سیاہ فام خواتین کی زچگی کے دوران صحت اور بڑھتے ہوئے طبی اخراجات پر گفتگو ہوئی، لیکن اس مشترکہ تقریب کے سیاسی مضمرات صحت کے مسئلے سے کہیں وسیع تھے
واشنگٹن پوسٹ کے مطابق دونوں ڈیموکریٹس مختلف سیاسی کمزوریوں اور مختلف حلقوں تک پہنچنے کی ضرورت کا سامنا کر رہے ہیں،السید نے سخت اور متنازع ڈیموکریٹک پرائمری کے بعد پارٹی کی روایتی حمایت رکھنے والے بعض حلقوں، خصوصاً سیاہ فام اور یہودی ووٹروں میں اپنی حمایت مستحکم کرنے کی کوشش کی ہے، جبکہ ہیرس کی موجودگی ایسے ڈیموکریٹک ووٹروں کو پیغام دینے کا ذریعہ بنی جو السید کی سیاست سے اب تک فاصلے پر رہے ہیں
دوسری طرف السید کی موجودگی ہیرس کو پارٹی کے ترقی پسند ووٹروں کے ساتھ دوبارہ رابطے کا موقع فراہم کرتی ہے،السید نے 2024 کی ڈیموکریٹک پرائمری میں مشی گن کی “Uncommitted” مہم کی حمایت کی تھی، جو بڑی حد تک غزہ میں جنگ سے متعلق بائیڈن انتظامیہ کی پالیسی کے خلاف احتجاج سے جڑی تھی، تاہم بعد میں انہوں نے ہیرس کی حمایت کی،موجودہ مہم میں السید نے خارجہ پالیسی کے بجائے مہنگائی، صحت عامہ اور Medicare for All جیسے داخلی معاملات کو زیادہ نمایاں رکھا ہے
ڈیٹرائٹ کے Birth Detroit مرکز میں ہونے والی نشست میں ہیرس نے السید کو زچگی کی صحت کے معاملے پر اپنا ساتھی قرار دیا اور کہا کہ امریکی سینیٹ کو موجودہ انتظامیہ کی پالیسیوں کے خلاف ایک روک کا کردار ادا کرنا چاہیے،انہوں نے سیاہ فام خواتین کی صحت، Medicaid اور طبی تحقیق کے معاملات کو بھی سیاسی بحث سے جوڑا
یہ السید اور ہیرس کی پہلی مشترکہ عوامی مہم تھی جب ہیرس نے ڈیموکریٹک پرائمری میں کامیابی کے بعد السید کی حمایت کی تھی،السید مشی گن کے سابق پبلک ہیلتھ چیف بھی رہ چکے ہیں اور نومبر کے سینیٹ انتخاب میں ریپبلکن امیدوار مائیک راجرز کا مقابلہ کر رہے ہیں
ہیرس کے لیے مشی گن کی اہمیت اس لیے بھی نمایاں ہے کہ وہ 2028 کے صدارتی انتخاب میں دوبارہ امیدوار بننے کے امکان پر غور کر رہی ہیں اور مشی گن آنے والے ڈیموکریٹک پرائمری شیڈول میں ابتدائی اہم ریاستوں میں شامل ہے،یوں ڈیٹرائٹ کی یہ مشترکہ تقریب صرف ایک سینیٹ امیدوار کی انتخابی مہم نہیں بلکہ ڈیموکریٹک پارٹی کے اندر مختلف دھڑوں کے درمیان فاصلے کم کرنے کی جاری کوشش کا بھی حصہ بن گئی ہے