ترکیہ میں اسکول کے باہر طالب علم کی فائرنگ، 11 طلبہ زخمی، 2 کی حالت تشویشناک
ترکیہ کے مغربی صوبے مانیسا کے ضلع ترگوتلو میں ایک ہائی اسکول کے باہر ایک طالب علم نے فائرنگ کردی جس کے نتیجے میں کم از کم 11 طلبہ زخمی ہوگئے، جن میں سے 2 کی حالت تشویشناک بتائی گئی ہے پولیس نے مبینہ حملہ آور کو گرفتار کرلیا جبکہ واقعے کی وجوہات جاننے کے لیے تحقیقات شروع کردی گئی ہیں
فائرنگ منگل کی صبح تقریباً 8 بجے انجی اوزمیذ پیشہ ورانہ اور تکنیکی ہائی اسکول کے قریب اس وقت ہوئی جب طلبہ اسکول پہنچ رہے تھے حکام کے مطابق مشتبہ حملہ آور نابالغ ہے اور ابتدائی اطلاعات کے مطابق وہ اسی اسکول کا طالب علم تھا اس نے مبینہ طور پر اپنی نانی کے گھر سے لی گئی شکاری بندوق سے اسکول کے باہر سڑک پر فائرنگ کی
فائرنگ کے فوراً بعد پولیس اور طبی امدادی ٹیمیں موقع پر پہنچیں اور زخمی طلبہ کو اسپتال منتقل کیا گیا حملہ آور کو فرار ہونے کی کوشش کے دوران گرفتار کرلیا گیا تفتیش کے سلسلے میں اس کے والدین اور دادا کو بھی حراست میں لیا گیا ہے کیونکہ بندوق دادا کی ملکیت بتائی جارہی ہے
حکام نے ابھی تک حملے کی حتمی وجہ نہیں بتائی تحقیقات میں اس امکان کو بھی دیکھا جارہا ہے کہ اسکول میں مبینہ ہراسانی یا طالب علم کو تنگ کیے جانے کا معاملہ فائرنگ کی وجہ بنا ہو، تاہم یہ بات ابھی ثابت نہیں ہوئی اور تحقیقات جاری ہیں
یہ واقعہ ترکیہ میں اسکولوں کی سکیورٹی کے حوالے سے پہلے ہی موجود تشویش کے دوران پیش آیا ہے رواں سال اپریل میں صرف ایک دن کے وقفے سے جنوبی اور جنوب مشرقی ترکیہ میں اسکول فائرنگ کے 2 واقعات ہوئے تھے شانلی عرفہ میں ایک سابق طالب علم کی فائرنگ سے 16 افراد زخمی ہوئے تھے، جبکہ قہرمان مرعش میں ایک 14 سالہ طالب علم نے اسکول میں فائرنگ کرکے ایک استاد اور 9 طلبہ کو ہلاک کردیا تھا
ان واقعات کے بعد ترکیہ کی حکومت نے اسکولوں میں سکیورٹی سخت کرنے اور اسلحہ رکھنے پر مزید سخت نگرانی کے اقدامات کا اعلان کیا تھا موجودہ تعلیمی سال کے آغاز پر بھی تعلیمی اداروں کی سکیورٹی کے لیے نئے انتظامات کیے گئے تھے، تاہم مانیسا کا تازہ واقعہ ان اقدامات کے باوجود اسکولوں کے قریب اسلحہ تک نوجوانوں کی رسائی اور تعلیمی اداروں کی حفاظت سے متعلق نئے سوالات اٹھا رہا ہے
