آسٹن میں ICE اہلکار کی فائرنگ، شخص شدید زخمی، واقعے کی آزادانہ تحقیقات کا مطالبہ
آسٹن:امریکی ریاست ٹیکساس کے شہر آسٹن میں اتوار 20 ستمبر 2026 کو دوپہر تقریباً 1 بجے سے کچھ دیر پہلے امریکی امیگریشن اینڈ کسٹمز انفورسمنٹ (ICE) کے ایک وفاقی اہلکار نے ایک شخص کو گولی مار کر زخمی کر دیا،حکام کے مطابق فائرنگ نارتھ آسٹن میں Anderson Square اور Research Boulevard کے قریب ایک ٹریفک اسٹاپ کے بعد ہوئی،زخمی شخص کو ایک گولی دھڑ کے اوپری حصے میں لگی اور اسے ہسپتال منتقل کیا گیا، جہاں اس کی حالت تشویشناک مگر مستحکم بتائی گئی
آسٹن پولیس چیف لیزا ڈیوس نے ابتدائی بریفنگ میں کہا کہ پولیس اہلکار فائرنگ یا کارروائی میں شامل نہیں تھے،ان کے مطابق ابتدائی معلومات میں ایک مختصر پیدل تعاقب کا ذکر سامنے آیا ہے، تاہم تحقیقات کے ابتدائی مرحلے میں واقعے کی مکمل تفصیلات واضح نہیں تھیں،پولیس کی خصوصی تحقیقاتی ٹیم جائے وقوعہ پر پہنچ گئی اور ICE کے متعلقہ حکام سے رابطے میں ہے
مقامی حکام کے مطابق فائرنگ کے مقام پر ایک گہرے نیلے رنگ کی Toyota Corolla موجود تھی جس کے مسافر جانب کے دروازے کو نقصان پہنچا تھا اور گاڑی پر گولیوں کے نشانات بھی دکھائی دیے،ایک مقامی عہدیدار، آسٹن سٹی کونسل کے رکن مائیک سیگل، نے دعویٰ کیا کہ وفاقی اہلکار نے پہلے گاڑی کو ٹکر ماری، پھر اپنی گاڑی سے اتر کر کم از کم پانچ گولیاں چلائیں،
واقعے کے فوراً بعد علاقے میں وفاقی، ریاستی اور مقامی قانون نافذ کرنے والے اداروں کی بڑی تعداد پہنچ گئی، جبکہ تقریباً 100 افراد پر مشتمل احتجاجی ہجوم بھی جمع ہوگیا،بعض مظاہرین نے ICE کے خلاف نعرے لگائے اور ایجنسی کی کارروائیوں پر احتجاج کیا
آسٹن کے میئر کرک واٹسن نے کہا کہ وہ واقعے پر سخت تشویش رکھتے ہیں اور چاہتے ہیں کہ آسٹن پولیس تحقیقات میں شامل ہو تاکہ تفتیش میں ایک آزاد، تیسرے فریق کی نظر موجود ہو،ان کا کہنا تھا کہ ICE کو خود اپنے اہلکار کے خلاف فائرنگ کی تحقیقات نہیں کرنی چاہئیں
زخمی شخص کی شناخت، قومیت اور فائرنگ سے پہلے پیش آنے والے واقعات کی مکمل تفصیلات فوری طور پر سامنے نہیں آئی ہیں،امریکی محکمہ ہوم لینڈ سکیورٹی، جو ICE کی نگرانی کرتا ہے، ابتدائی مقامی پریس کانفرنس میں شریک نہیں ہوا اور فوری طور پر تفصیلی مؤقف بھی جاری نہیں کیا
یہ واقعہ ایسے وقت پیش آیا ہے جب ملک بھر میں ICE کی کارروائیوں اور وفاقی امیگریشن پالیسی پر شدید سیاسی و عوامی بحث جاری ہے،آسٹن کی فائرنگ سے دو ماہ سے کچھ زیادہ عرصہ قبل، 7 جولائی کو ہیوسٹن میں ICE کے ایک اہلکار نے 52 سالہ Lorenzo Salgado Araujo کو گولی مار کر ہلاک کر دیا تھا، جبکہ اس واقعے کی تحقیقات بھی جاری ہیں