صادق آباد میں پولیس کانسٹیبل نے ڈیوٹی رائفل سے مبینہ طور پر خودکشی کرلی، وجوہات کی تحقیقات جاری

پنجاب کے آخری شہر صادق آباد میں سندھ پنجاب سرحد کے قریب دوعوالہ چیک پوسٹ پر تعینات پنجاب کانسٹیبلری کے ایک اہلکار کی لاش مورچے سے برآمد ہوئی ہے۔ ذرائع کے مطابق کانسٹیبل حسن سلیم نے اپنی ڈیوٹی پر موجود کلاشنکوف سے خود کو فائر مار کر مبینہ طور پر خودکشی کی۔

ذرائع کے مطابق حسن سلیم کا تعلق بہاولپور سے تھا اور وہ 2018 میں پولیس میں بھرتی ہوا تھا۔ وہ پنجاب کانسٹیبلری 6 کا اہلکار تھا اور صادق آباد کے قریب سندھ پنجاب سرحد پر واقع دوعوالہ چیک پوسٹ پر تعینات تھا۔

اہلکار کو چیک پوسٹ کے مورچے میں مردہ حالت میں پایا گیا۔ ابتدائی معلومات کے مطابق واقعہ خودکشی کا معلوم ہوتا ہے، تاہم پولیس کی جانب سے اس پہلو سمیت دیگر ممکنہ وجوہات کی تحقیقات کی جا رہی ہیں کہ اہلکار نے یہ انتہائی قدم کیوں اٹھایا۔

سوشل میڈیا پر بعض حلقوں کی جانب سے دعویٰ کیا جا رہا ہے کہ حسن سلیم مبینہ طور پر بھوک، مہنگائی اور غربت سے پریشان تھا، تاہم اس دعوے کی آزادانہ طور پر تصدیق نہیں ہو سکی۔ پولیس کی تحقیقات مکمل ہونے تک خودکشی کی حتمی وجہ کے بارے میں کوئی نتیجہ اخذ کرنا قبل از وقت ہوگا۔

واقعے کے اصل محرکات جاننے کے لیے پولیس کی جانب سے شواہد اور دیگر متعلقہ پہلوؤں کا جائزہ لیا جا رہا ہے، جبکہ یہ بھی تحقیقات کا حصہ ہے کہ واقعہ خودکشی تھا یا اس کے پیچھے کوئی اور معاملہ کارفرما تھا