کارنی کا ایڈمنٹن میں اعلان، البرٹا کینیڈا کا حصہ ہے اور رہے گا

کارنی کا ایڈمنٹن میں اعلان،
البرٹا کینیڈا کا حصہ ہے اور رہے گا

وزیر اعظم مارک کارنی نے البرٹا میں علیحدگی کے ممکنہ ریفرنڈم سے پہلے ایڈمنٹن میں ہونے والی ’’فور ایور کینیڈین‘‘ ریلی میں شرکت کرکے کینیڈا کے ساتھ صوبے کی یکجہتی پر زور دیا۔ اس اجتماع کا بنیادی پیغام یہ تھا کہ البرٹا کا مستقبل کینیڈا کے ساتھ جڑا ہوا ہے اور صوبے کے عوام کی آواز کو وفاقی سیاست میں اہمیت دی جانی چاہیے
کارنی نے کہا کہ البرٹا کو کینیڈا سے الگ ہونے کے بجائے ملک کے اندر رہتے ہوئے اپنی معیشت، توانائی کے وسائل اور کاروباری مواقع کو مزید مضبوط بنانا چاہیے ان کے مطابق، موجودہ عالمی حالات میں کینیڈا کو تقسیم کرنا ملک اور صوبے دونوں کے لیے طویل غیر یقینی صورت حال اور معاشی مواقع کے ضیاع کا سبب بن سکتا ہے
کارنی نے اپنی تقریر میں تسلیم کیا کہ البرٹا کے بہت سے شہری وفاقی حکومت کی پالیسیوں سے ناخوش رہے ہیں صوبے میں یہ شکایات طویل عرصے سے موجود ہیں کہ اوٹاوا توانائی کے شعبے پر ضرورت سے زیادہ پابندیاں لگاتا ہے اور البرٹا کی معاشی ضروریات کو پوری طرح اہمیت نہیں دیتا تاہم، وزیر اعظم کا مؤقف ہے کہ ان اختلافات کو علیحدگی کے بجائے وفاقی حکومت اور صوبائی حکومت کے درمیان تعاون کے ذریعے حل کیا جانا چاہیے
البرٹا کی وزیر اعلیٰ ڈینیئل اسمتھ بھی صوبے کی علیحدگی کی حامی نہیں ہیں، اگرچہ وہ وفاقی حکومت کے ساتھ متعدد پالیسی معاملات پر اختلاف رکھتی ہیں حالیہ دنوں میں کارنی اور اسمتھ کے درمیان توانائی، بنیادی ڈھانچے اور پائپ لائن منصوبوں پر تعاون کی کوششیں بھی سامنے آئی ہیں
البرٹا میں 19 اکتوبر کو ہونے والا ریفرنڈم براہ راست آزادی کا فیصلہ نہیں ہوگا ووٹروں سے پوچھا جائے گا کہ آیا صوبہ کینیڈا کا حصہ برقرار رہے یا مستقبل میں کینیڈا سے علیحدگی کے لیے قانونی طریقۂ کار شروع کرنے کی جانب پیش قدمی کرے اگر علیحدگی کے عمل کی حمایت میں اکثریت سامنے آتی ہے تو اس کے بعد ایک الگ اور قانونی طور پر پابند ریفرنڈم کی راہ کھل سکتی ہے کینیڈا سے علیحدگی کے لیے آئینی تقاضے اور مذاکرات بھی ضروری ہوں گے
کارنی نے البرٹا کے شہریوں سے اپیل کی کہ وہ اپنے ووٹ کے ذریعے کینیڈا کے ساتھ رہنے کا فیصلہ کریں ان کا کہنا تھا کہ البرٹا کی توانائی، زراعت اور دیگر معاشی شعبے پورے ملک کی ترقی میں اہم کردار ادا کرتے ہیں اور متحد رہنے سے صوبے کو بھی زیادہ فائدہ پہنچ سکتا ہے
ایڈمنٹن کی ’’فور ایور کینیڈین‘‘ ریلی کا مقصد بھی ریفرنڈم سے پہلے عوام کو یہ پیغام دینا تھا کہ البرٹا کی شکایات دور کرنے اور صوبے کے مفادات کا تحفظ کرنے کا راستہ کینیڈا سے علیحدگی نہیں بلکہ ملک کے اندر رہتے ہوئے سیاسی اور معاشی اصلاحات ہے