امریکی سینیٹ کی 35 نشستوں میں 13 پر ڈیموکریٹس اور 15 پر ریپبلکنز کی پوزیشن مضبوط، 7 کانٹے کے مقابلوں میں سروے 6 پر ڈیموکریٹس آگے
رپورٹ : آفاق فاروقی
واشنگٹن: امریکا میں 3 نومبر 2026 کے وسط مدتی انتخابات سے پہلے سینیٹ کا کنٹرول حاصل کرنے کی جنگ میں ڈیموکریٹس نے کئی سخت مقابلوں میں پیش رفت کی ہے،9 اکتوبر تک دستیاب انتخابی جائزوں کے مطابق، کُک پولیٹیکل رپورٹ نے 35 انتخابی نشستوں میں سے 13 کو ڈیموکریٹس کے حق میں، 15 کو ریپبلکنز کے حق میں اور 7 کو کانٹے کے مقابلوں کی فہرست میں رکھا ہے،ان 7 غیر یقینی مقابلوں کے تازہ پولنگ اوسط کا الگ جائزہ لیا جائے تو 6 ریاستوں میں ڈیموکریٹ امیدوار آگے اور ایک میں ریپبلکن امیدوار کو معمولی برتری حاصل ہے،یہ موجودہ انتخابی جائزوں اور سروے کی صورت حال ہے، حتمی نتائج نہیں
کانٹے کے مقابلوں میں الاسکا، آئیووا، کنساس، مین، مشی گن، اوہائیو اور ٹیکساس شامل ہیں،ریئل کلیئر پولیٹکس کے پولنگ اوسط کے مطابق الاسکا میں ڈیموکریٹ میری پیلٹولا، ریپبلکن سینیٹر ڈین سلیوان سے 1.2 پوائنٹ آگے ہیں ،آئیووا میں ڈیموکریٹ زیک ٹورک کو ریپبلکن ایشلے ہنسن پر 0.7 پوائنٹ کی معمولی برتری حاصل ہے،مین میں ڈیموکریٹ ٹرائے جیکسن، ریپبلکن سینیٹر سوزن کولنز سے 0.7 پوائنٹ آگے ہیں،مشی گن میں ڈیموکریٹ عبدل السید، ریپبلکن مائیک راجرز سے 3.2 پوائنٹ اور اوہائیو میں ڈیموکریٹ شیروڈ براؤن، ریپبلکن جون ہسٹڈ سے 3.1 پوائنٹ آگے ہیں،ٹیکساس میں ڈیموکریٹ جیمز ٹالاریکو کو ریپبلکن کین پیکسٹن پر 2.8 پوائنٹ کی برتری حاصل ہے،اس کے برعکس کنساس میں ریپبلکن سینیٹر راجر مارشل، ڈیموکریٹ ایڈم ہیملٹن سے صرف 0.2 پوائنٹ آگے ہیں
یہ اعداد بتاتے ہیں کہ سات سخت مقابلوں میں ڈیموکریٹس کی برتری زیادہ ریاستوں میں نظر آ رہی ہے، لیکن کئی ریاستوں میں فرق ایک پوائنٹ سے بھی کم ہے،مثال کے طور پر آئیووا، مین اور کنساس میں معمولی فرق کی وجہ سے کسی بھی نئے سروے میں ترتیب بدل سکتی ہے،اوہائیو اور ٹیکساس میں ڈیموکریٹس کی برتری نسبتاً زیادہ ہے، تاہم ان ریاستوں کے نتائج کے لیے ابھی کئی ہفتوں کی انتخابی مہم باقی ہے،پولنگ اوسط مختلف اداروں کے سروے جمع کرکے بنائے جاتے ہیں، اس لیے ان کا مطلب یہ نہیں کہ ہر انفرادی سروے میں یہی امیدوار آگے ہے
انتخابی درجہ بندی میں حالیہ تبدیلیاں بھی ڈیموکریٹس کے لیے اہم ہیں،کُک پولیٹیکل رپورٹ نے کنساس کو ریپبلکنز کی طرف جھکے ہوئے مقابلے سے کانٹے کی ٹکر میں تبدیل کیا، نیو ہیمپشائر کو ڈیموکریٹس کے حق میں معمولی برتری والی نشست قرار دیا اور نارتھ کیرولائنا میں ڈیموکریٹس کی پوزیشن کو مزید مضبوط درجہ دیا،واشنگٹن پوسٹ کے مطابق، ان تبدیلیوں کے بعد ریپبلکنز کی زیرِ قبضہ سینیٹ کی 6 نشستوں پر ڈیموکریٹس کے لیے کامیابی کے ممکنہ مواقع زیرِ بحث ہیں،تاہم نیو ہیمپشائر اور نارتھ کیرولائنا کُک کی موجودہ درجہ بندی میں ان سات کانٹے کے مقابلوں کا حصہ نہیں، اس لیے انہیں سات ریاستوں کے پولنگ اوسط میں شامل نہیں کیا گیا
ڈیموکریٹس کی پیش رفت کے پیچھے معیشت، مہنگائی اور صدر ڈونلڈ ٹرمپ کی کارکردگی پر عوامی تشویش کو اہم عوامل قرار دیا جا رہا ہے؟رائٹرز کی 8 اکتوبر کی رپورٹ کے مطابق، بلند قیمتوں اور ایران کے ساتھ جنگ کے اثرات ریپبلکن امیدواروں کے لیے سیاسی چیلنج بن رہے ہیں،ڈیموکریٹس ان مسائل کو اپنی مہم میں نمایاں کر رہے ہیں اور روایتی ریپبلکن ریاستوں میں بھی انتخابی وسائل لگا رہے ہیں؟دوسری جانب ریپبلکنز امیگریشن، سرحدی تحفظ اور اپنی معاشی پالیسیوں کو نمایاں کرتے ہوئے سینیٹ کی اکثریت برقرار رکھنے کی کوشش کر رہے ہیں
ریپبلکنز کے لیے خطرہ صرف پولنگ تک محدود نہیں،ایسوسی ایٹڈ پریس کے مطابق، ریپبلکن سینیٹ مہم کے مالی معاون گروپ نے نارتھ کیرولائنا میں اپنی سرمایہ کاری کم کرکے کنساس میں ریپبلکن سینیٹر راجر مارشل کی حمایت کے لیے مزید رقم مختص کی ہے،یہ تبدیلی اس بات کی علامت ہے کہ پارٹی ان ریاستوں میں بھی اپنے امیدواروں کے لیے اضافی وسائل استعمال کر رہی ہے جہاں پہلے اسے نسبتاً محفوظ پوزیشن کی توقع تھی،اس کے باوجود ریپبلکنز کی کئی نشستوں پر امیدواروں کو مقامی سیاسی رجحانات اور ڈیموکریٹ مہم کے دباؤ کا سامنا ہے
سینیٹ میں اس وقت ریپبلکنز کے پاس 53 نشستیں ہیں، جبکہ ڈیموکریٹس کے ساتھ ووٹ دینے والے آزاد ارکان سمیت مخالف اتحاد کے پاس 47 نشستیں ہیں،اکثریت حاصل کرنے کے لیے ڈیموکریٹس کو موجودہ تعداد کے مقابلے میں کم از کم 4 نشستوں کا خالص اضافہ درکار ہے،2026 میں انتخابی مقابلے کے لیے آنے والی 35 نشستوں میں 13 ڈیموکریٹس اور 22 ریپبلکنز کے پاس ہیں، اس لیے ڈیموکریٹس کو اپنی نشستیں محفوظ رکھنے کے ساتھ ریپبلکنز کی کئی نشستیں بھی حاصل کرنا ہونگی
موجودہ صورت حال کا خلاصہ یہ ہے کہ کُک پولیٹیکل رپورٹ کی درجہ بندی میں 13 نشستیں ڈیموکریٹس، 15 ریپبلکنز کے حق میں اور 7 مقابلے غیر یقینی ہیں،ان سات سخت مقابلوں کے پولنگ اوسط میں 6 ریاستوں میں ڈیموکریٹ امیدوار آگے اور ایک میں ریپبلکن امیدوار معمولی برتری پر ہیں،مہنگائی، ٹرمپ انتظامیہ کی مقبولیت، امیدواروں کی مقامی طاقت اور ووٹروں کی شرکت آئندہ ہفتوں میں اس صورت حال کو بدل سکتی ہے
