صدر کا عہدہ چھوڑنے کے بعد ووچچ کی وزارتِ عظمیٰ کے لیے انتخابی مہم، بلغراد میں ہزاروں کا اجتماع
سربیا کے سابق صدر الیگزینڈر ووچچ نے صدر کا عہدہ چھوڑنے کے چند روز بعد وزارتِ عظمیٰ کے لیے اپنی انتخابی مہم کا باضابطہ آغاز کر دیا ہے،ہفتے کے روز دارالحکومت بلغراد کے سب سے بڑے انڈور ایرینا میں ان کے ہزاروں حامی جمع ہوئے، جہاں ووچچ نے 25 اکتوبر کے قبل از وقت پارلیمانی انتخابات کے لیے اپنی جماعت کی مہم کا آغاز کیا
ایسوسی ایٹڈ پریس کے مطابق ووچچ نے 27 ستمبر کو صدر کے عہدے سے استعفیٰ دے دیا تھا، حالانکہ ان کی دوسری صدارتی مدت مکمل ہونے میں 7 ماہ سے زیادہ وقت باقی تھا،سربیا کا آئین انہیں تیسری مرتبہ صدر بننے کی اجازت نہیں دیتا، اس لیے اب انہوں نے اپنی سربین پروگریسو پارٹی کی قیادت کرتے ہوئے پارلیمانی انتخابات میں حصہ لینے کا فیصلہ کیا ہے
اگر ووچچ کی جماعت پارلیمان میں اکثریت حاصل کر لیتی ہے تو پارلیمان ان کے وزیر اعظم منتخب ہونے کی راہ ہموار کر سکتی ہے،یوں صدر کا عہدہ چھوڑنے کے باوجود وہ سربیا کی سیاست میں اپنا مرکزی کردار برقرار رکھنے کی کوشش کر رہے ہیں
ہفتے کو بلغراد ایرینا کے اطراف سربیا کے مختلف علاقوں سے آنے والی درجنوں بسوں کی وجہ سے ٹریفک متاثر ہوئی،حامی سربیا کے پرچم اور ووچچ کی تصاویر والے بینرز اٹھائے ایرینا پہنچے،اس اجتماع میں سلوواکیہ کے وزیر اعظم رابرٹ فیتسو بھی خصوصی مہمان کے طور پر شریک ہوئے
25 اکتوبر کا انتخاب ووچچ کے لیے اہم سیاسی امتحان بن گیا ہے،ایک طرف ان کی سربین پروگریسو پارٹی ہے تو دوسری طرف 2024 میں نووی ساد کے ریلوے اسٹیشن پر پیش آنے والے حادثے کے بعد شروع ہونے والے حکومت مخالف احتجاج سے ابھرنے والی طلبہ قیادت میں قائم سیاسی تحریک کے امیدوار ہیں،اس حادثے میں 16 افراد ہلاک ہوئے تھے اور اس کے بعد ملک میں طویل احتجاجی تحریک شروع ہوئی
طلبہ کی قیادت میں چلنے والی تحریک نے بدعنوانی، قانون کی حکمرانی اور سیاسی اصلاحات کو اپنی مہم کا اہم حصہ بنایا ہے،ووچچ نے اس تحریک پر بیرونی عناصر کی حمایت حاصل کرنے کے الزامات بھی عائد کیے ہیں، تاہم ان الزامات کے حق میں ثبوت پیش نہیں کیے گئے
ووچچ نے حالیہ دنوں میں سربیا کے مختلف شہروں اور دیہات کا دورہ کرتے ہوئے انتخابی مہم تیز کر دی ہے،بلغراد ایرینا کا بڑا اجتماع اسی مہم کا سب سے نمایاں مظاہرہ تھا
سربیا میں ووچچ ایک دہائی سے زیادہ عرصے سے ملکی سیاست کی مرکزی شخصیت ہیں،اب 25 اکتوبر کا انتخاب یہ طے کرے گا کہ وہ صدر کا عہدہ چھوڑنے کے بعد وزیر اعظم بن کر اقتدار میں اپنا اثر و رسوخ برقرار رکھ پاتے ہیں یا نہیں