امریکی پاسپورٹ میں پانچ بڑی تبدیلیاں، پہلی بار درخواست بھی آن لائن، 2028 میں نیا ڈیزائن اور 50 صفحات والا پاسپورٹ ختم
واشنگٹن:امریکی محکمہ خارجہ نے پاسپورٹ کے نظام میں بڑی تبدیلیوں کا اعلان کیا ہے جن میں پہلی مرتبہ پاسپورٹ حاصل کرنے والوں کے لیے مکمل آن لائن درخواست، گھر بیٹھے پاسپورٹ تصویر جمع کرانے کی سہولت، 2028 سے نیا پاسپورٹ ڈیزائن، 50 صفحات والے پاسپورٹ کا خاتمہ اور پاسپورٹ کی ترسیل کے لیے نئی محفوظ پیکیجنگ شامل ہے
امریکی وزیر خارجہ مارکو روبیو کے مطابق حکومت کا ہدف ہے کہ 2027 کے اختتام تک زیادہ تر امریکی شہری پہلی مرتبہ پاسپورٹ یا پاسپورٹ کارڈ کے لیے آن لائن درخواست دے سکیں،موجودہ نظام میں پہلی مرتبہ پاسپورٹ حاصل کرنے والے افراد کو کاغذات کے ساتھ ذاتی طور پر مقررہ مرکز پر جانا پڑتا ہے، جبکہ آن لائن تجدید کی سہولت پہلے ہی دستیاب ہے،نئے نظام میں درخواست گزار سرکاری ویب سائٹ America.gov کے ذریعے مصنوعی ذہانت سے چلنے والے رہنما نظام کی مدد لے سکے گا اور Login.gov کے ذریعے اپنی شناخت کی تصدیق کرے گا
دوسری بڑی تبدیلی پاسپورٹ تصویر کے حوالے سے ہوگی،پہلی مرتبہ درخواست دینے والے افراد بھی اپنے موبائل فون یا کسی دوسرے آلے سے لی گئی ڈیجیٹل تصویر آن لائن جمع کرا سکیں گے،روبیو کے مطابق درخواست گزار تصویر اپنے گھر سے لے سکے گا اور اسے حتمی درخواست جمع کرانے سے پہلے دیکھ کر دوبارہ تصویر لینے کا موقع بھی ملے گا،تاہم چہرہ تبدیل کرنے والے مصنوعی یا تصویری فلٹر استعمال کرنے کی اجازت نہیں ہوگی
تیسری تبدیلی پاسپورٹ کے ڈیزائن میں ہوگی،محکمہ خارجہ نے 2028 کے لیے نئے پاسپورٹ کا نمونہ پیش کیا ہے جس میں امریکی قومی نشان پہلے سے زیادہ نمایاں اور سنہری ہوگا،نئے ڈیزائن کو امریکی تاریخ اور قومی علامتوں سے جوڑا گیا ہے،پاسپورٹ کے اندر مختلف تاریخی تصاویر کے ساتھ عقاب کی ایسی ترتیب بنائی گئی ہے کہ صفحات تیزی سے پلٹنے پر عقاب کے اڑنے کا منظر محسوس ہوتا ہے
چوتھی اہم تبدیلی ان مسافروں کے لیے ہے جو زیادہ صفحات والا پاسپورٹ استعمال کرتے ہیں،امریکی محکمہ خارجہ نے فیصلہ کیا ہے کہ نئے ڈیزائن کے ساتھ 26 صفحات اور 50 صفحات کے موجودہ دو سائز ختم کرکے صرف 38 صفحات کا ایک ہی پاسپورٹ جاری کیا جائے گا،محکمہ خارجہ کے مطابق تقریباً 92 فیصد درخواست گزار پہلے ہی 26 صفحات والا پاسپورٹ لیتے ہیں، جبکہ تقریباً 8 فیصد افراد 50 صفحات والا پاسپورٹ حاصل کرتے ہیں،حکام کا کہنا ہے کہ 38 صفحات کا ایک ہی سائز زیادہ تر شہریوں کی ضروریات پوری کرے گا اور پاسپورٹ کی تیاری میں کارکردگی اور وسائل کے استعمال کو بہتر بنائے گا
تاہم کثرت سے بیرون ملک سفر کرنے والے امریکی شہریوں اور بیرون ملک رہنے والے بعض امریکیوں کے لیے یہ تبدیلی اہم ہوسکتی ہے، کیونکہ 50 صفحات والے پاسپورٹ کا آپشن ختم ہونے کے بعد ان کے پاس ویزوں اور امیگریشن مہروں کے لیے پہلے کے مقابلے میں کم صفحات دستیاب ہوں گے اور ممکن ہے انہیں زیادہ مرتبہ پاسپورٹ کی تجدید کرانا پڑے،محکمہ خارجہ نے بھی تسلیم کیا ہے کہ ایسے مسافروں پر اس تبدیلی کا نسبتاً زیادہ اثر پڑ سکتا ہے
پانچویں تبدیلی پاسپورٹ کی ترسیل کے طریقے میں ہے،محکمہ خارجہ نے پاسپورٹ بھیجنے کے لیے نئی مضبوط اور زیادہ محفوظ پیکیجنگ دکھائی ہے،موجودہ عام ڈاک کے لفافے کے مقابلے میں نئی پیکیجنگ سفید ڈبے کی شکل میں ہوگی جس پر امریکی قومی نشان نمایاں ہوگا اور پاسپورٹ کو زیادہ محفوظ انداز میں رکھا جائے گا
یہ تبدیلیاں اس وقت سامنے آئی ہیں جب محکمہ خارجہ پاسپورٹ کے پورے نظام کو زیادہ ڈیجیٹل بنانے کی کوشش کر رہا ہے،نئے نظام کا مقصد کاغذی کارروائی، ذاتی حاضری اور طویل انتظار کم کرنا ہے، جبکہ 2028 کا نیا پاسپورٹ امریکی تاریخ اور قومی علامتوں کو نمایاں کرے گا
ایک الگ محدود مدت کے یادگاری پاسپورٹ کا معاملہ بھی موجود ہے،امریکہ کی 250ویں سالگرہ کے موقع پر جاری کیے جانے والے خصوصی پاسپورٹ میں صدر ڈونلڈ ٹرمپ کی تصویر اور اعلانِ آزادی سے متعلق تصاویر شامل کی گئی ہیں، تاہم یہ عام 2028 کے نئے پاسپورٹ ڈیزائن سے الگ یادگاری پاسپورٹ ہے
یوں امریکی شہریوں کے لیے پاسپورٹ کا مستقبل صرف نئے ڈیزائن تک محدود نہیں، بلکہ درخواست دینے کے طریقے، تصویر، صفحات کی تعداد، دستاویز کی ترسیل اور مجموعی طور پر پاسپورٹ حاصل کرنے کے عمل میں بھی نمایاں تبدیلیاں لا رہا ہے