ایتھنز میں اپارٹمنٹ عمارت دھماکے کے بعد چند سیکنڈ میں زمین بوس، 6 افراد ہلاک، 4 امریکی سیاح بھی شامل
ایتھنز: یونان کے تاریخی علاقے پلاکا میں دو منزلہ اپارٹمنٹ عمارت میں ہونے والے شدید دھماکے کے بعد عمارت چند ہی سیکنڈ میں منہدم ہوگئی، جس کے نتیجے میں 6 افراد ہلاک ہوگئے،یونانی حکام نے واقعے کی وجوہات جاننے کے لیے تحقیقات شروع کردی ہیں
امدادی ٹیموں نے ہفتے کے روز ملبے سے تمام 6 افراد کی لاشیں برآمد کیں،حکام کے مطابق ہلاک ہونے والوں میں 4 امریکی سیاح بھی شامل ہیں،یہ لاشیں دھماکے کے 24 گھنٹے سے زیادہ وقت گزرنے کے بعد ملبے سے نکالی گئیں
دھماکا ہفتے کی صبح سے ایک روز قبل تاریخی پلاکا علاقے میں ہوا تھا، جو قدیم ایتھنز اور ایکروپولس کے قریب واقع ہونے کے باعث شہر کے اہم ترین سیاحتی علاقوں میں شمار ہوتا ہے،دھماکے کے فوراً بعد عمارت تیزی سے منہدم ہوگئی، جس کے باعث اندر موجود افراد کو نکلنے کا موقع نہیں مل سکا
یونانی حکام اب اس بنیادی سوال کا جواب تلاش کر رہے ہیں کہ عمارت میں ایسا کیا ہوا جس کے نتیجے میں اتنا شدید دھماکا ہوا اور پوری عمارت چند لمحوں میں تباہ ہوگئی،ابتدائی طور پر کسی ایک وجہ کو حتمی قرار نہیں دیا گیا اور تحقیقات مکمل ہونے تک دھماکے کی نوعیت کے بارے میں مختلف امکانات زیرِ غور ہیں
ریسکیو کارروائی کے دوران ملبہ ہٹانے کے لیے بھاری مشینری اور خصوصی امدادی ٹیمیں استعمال کی گئیں،واقعے نے تاریخی علاقے میں عمارتوں کی سلامتی اور تعمیراتی ضوابط کے حوالے سے بھی نئے سوالات پیدا کردیئے ہیں
یونانی حکام کا کہنا ہے کہ ہلاک ہونے والوں کی شناخت اور دھماکے کے اصل سبب کی مکمل وضاحت تحقیقات آگے بڑھنے کے بعد سامنے آئے گی
