اونٹاریو لبرل قیادت کی دوڑ میں شامل امیدواروں سے زیادہ تر شہری ناواقف
اونٹاریو لبرل پارٹی کی نئی قیادت کے لیے جاری دوڑ میں شامل 5 امیدواروں کے نام صوبے کے زیادہ تر شہریوں کے لیے اب بھی اجنبی ہیں۔ تازہ سروے کے مطابق سابق وفاقی وزیر نوید بینز، صوبائی رکن لی فیئرکلاف، اسٹیفنی بومن، ایرک لومبارڈی اور ڈیلن مارانڈو میں سے کسی کو بھی عوام کی واضح اکثریت اچھی طرح نہیں جانتی
1,600 اونٹاریو شہریوں سے 15 سے 19 ستمبر کے دوران کیے گئے لائزن اسٹریٹیجیز کے سروے میں 52 فیصد افراد نے کہا کہ وہ نوید بینز سے واقف نہیں، حالانکہ وہ وفاقی کابینہ میں وزیر رہ چکے ہیں اور لبرل قیادت کی دوڑ میں نمایاں امیدواروں میں شمار ہوتے ہیں لی فیئرکلاف اور اسٹیفنی بومن کے بارے میں تقریباً 75 فیصد افراد نے کہا کہ وہ انہیں نہیں جانتے، جبکہ ایرک لومبارڈی اور ڈیلن مارانڈو سے ناواقفیت کی شرح 82 سے 85 فیصد تک رہی
سروے میں امیدواروں کے بارے میں ابتدائی رائے بھی حاصل کی گئی کسی تعارف کے بغیر نوید بینز کو 12 فیصد، لی فیئرکلاف کو 6 فیصد، اسٹیفنی بومن کو 5 فیصد، ایرک لومبارڈی کو 3 فیصد اور ڈیلن مارانڈو کو 2 فیصد حمایت ملی، جبکہ 51 فیصد افراد نے کہا کہ وہ فیصلہ نہیں کر سکے اور 22 فیصد نے دیے گئے امیدواروں میں سے کسی کو منتخب نہیں کیا
تاہم جب سروے میں حصہ لینے والوں کو ہر امیدوار کے پس منظر کا مختصر تعارف دیا گیا تو رائے میں نمایاں تبدیلی آئی۔ لی فیئرکلاف کی حمایت 23 فیصد تک پہنچ گئی، نوید بینز 20 فیصد کے ساتھ ان کے قریب رہے، اسٹیفنی بومن 13 فیصد، ایرک لومبارڈی 10 فیصد اور ڈیلن مارانڈو 6 فیصد تک پہنچے لائزن اسٹریٹیجیز نے واضح کیا کہ یہ نتائج اونٹاریو لبرل پارٹی کے ارکان کے ووٹ یا قیادت کے حتمی نتیجے کی پیش گوئی نہیں کرتے کیونکہ سروے عام شہریوں سے کیا گیا تھا
لبرل ووٹروں میں صورتحال کچھ مختلف رہی خود کو لبرل ووٹر کہنے والے افراد میں تعارف سے پہلے نوید بینز کو 25 فیصد اور لی فیئرکلاف کو 11 فیصد حمایت حاصل تھی۔ امیدواروں کا مختصر تعارف سننے کے بعد بینز کی حمایت 32 فیصد جبکہ فیئرکلاف کی 26 فیصد ہو گئی اسٹیفنی بومن کو 15 فیصد، ایرک لومبارڈی کو 10 فیصد اور ڈیلن مارانڈو کو 5 فیصد حمایت ملی
سروے میں اونٹاریو کے مجموعی سیاسی ماحول بھی سامنے آیا فیصلہ کر چکے یا کسی جماعت کی طرف جھکاؤ رکھنے والے ووٹروں میں پروگریسو کنزرویٹو پارٹی کو 40 فیصد، لبرلز کو 34 فیصد اور این ڈی پی کو 21 فیصد حمایت حاصل ہوئی، جبکہ دیگر جماعتوں کا مجموعی حصہ 5 فیصد رہا یہ اعداد موجودہ جماعتی حمایت کی پیمائش ہیں اور لبرل قیادت کے انتخاب کا نتیجہ نہیں ہیں
سروے کے مطابق 31 فیصد اونٹاریو شہریوں نے کہا کہ وہ لبرل پارٹی کو ووٹ دینے پر ضرور غور کر سکتے ہیں، جبکہ مزید 27 فیصد نے کہا کہ وہ ممکنہ طور پر اس پر غور کر سکتے ہیں اس کے برعکس 36 فیصد نے کہا کہ وہ لبرل پارٹی کو ووٹ دینے پر غور نہیں کریں گے
لائزن اسٹریٹیجیز کے مطابق سروے کے نتائج اس بات کی نشاندہی کرتے ہیں کہ لبرل پارٹی کی قیادت کے امیدواروں کے لیے سب سے بڑا مسئلہ صرف پارٹی کے موجودہ حامیوں تک رسائی نہیں بلکہ ایسے شہریوں تک بھی اپنا تعارف اور سیاسی مؤقف پہنچانا ہے جو ابھی کسی امیدوار سے واقف نہیں تاہم سروے نے یہ بھی واضح کیا کہ امیدواروں کا تعارف سننے کے بعد رائے تبدیل ہو سکتی ہے اور موجودہ نتائج کو قیادت کے حتمی انتخاب کا نتیجہ نہیں سمجھا جا سکتا
