ایران نے 2024 سے زیر حراست امریکی شہری کو رہا کر دیا، ٹرمپ کا دعوی
امریکی صدر ڈونلڈ ٹرمپ نے بدھ کو اعلان کیا ہے کہ ایران نے ایک امریکی شہری کو رہا کر دیا ہے، جسے ان کے مطابق دسمبر 2024 سے “غلط طور پر حراست” میں رکھا گیا تھا۔
ٹرمپ نے سماجی رابطے کی ویب سائٹ پر بیان میں کہا کہ یہ خاتون اب ایران سے بحفاظت باہر آ چکی ہیں اور ان کی حالت بہتر ہے۔ تاہم صدر نے اپنے بیان میں اس شہری کا نام ظاہر نہیں کیا۔
ٹرمپ نے لکھا: “امریکہ ایران کی جانب سے خیر سگالی کے اس اقدام کو سراہتا ہے۔”
بعد ازاں رپورٹس میں بتایا گیا کہ رہا ہونے والی خاتون ڈینا کراری ہیں، جو دوہری امریکی اور ایرانی شہریت رکھتی ہیں۔
یہ پیش رفت ایسے وقت میں سامنے آئی ہے جب واشنگٹن اور تہران کے درمیان کئی معاملات پر کشیدگی کے باوجود سفارتی رابطوں اور قیدیوں کے تبادلوں سے متعلق کوششیں جاری ہیں۔ امریکی حکام ماضی میں بھی ایران میں زیر حراست امریکی شہریوں کی رہائی کو اپنی خارجہ پالیسی کا اہم مسئلہ قرار دیتے رہے ہیں