پاکستان ایران امریکا مذاکرات کی بحالی کے لیے سفارتی کوششیں دوبارہ تیز کرنے کا خواہاں

وزیر داخلہ محسن نقوی نے تہران میں ایرانی وزیر خارجہ عباس عراقچی اور صدر مسعود پزشکیان سے ملاقاتیں کی ہیں جس کا مقصد ایران اور امریکا کے درمیان تعطل کا شکار مذاکراتی عمل اور پاکستان کی ثالثی کی کوششوں کو دوبارہ فعال کرنا ہے
محسن نقوی تہران پہنچے جہاں انہوں نے ایرانی ہم منصب اسکندر مومنی سے ملاقات کے بعد عباس عراقچی سے بھی تفصیلی بات چیت کی
سفارتی ذرائع کے مطابق محسن نقوی کے دورے کا بنیادی مقصد اسلام آباد مفاہمتی یادداشت پر پیش رفت اور ایران امریکا مذاکرات میں پاکستان کی ثالثی کی کوششوں کو دوبارہ فعال کرنا ہے
دفاعی وزیر خواجہ آصف نے بھی بلومبرگ سے گفتگو میں کہا ہے کہ ایران اور امریکا کسی نہ کسی سمجھوتے کے قریب پہنچ رہے ہیں اور گزشتہ چند روز کے دوران امن معاہدے کے امکانات بہتر ہوئے ہیں
پاکستان نے حال ہی میں عباس عراقچی اور ایرانی پارلیمنٹ کے اسپیکر و چیف مذاکرات کار باقر قالیباف کو اسلام آباد کے دورے کی دعوت دی تھی تاہم ایرانی وزارت خارجہ نے کہا ہے کہ دونوں رہنما مناسب وقت پر پاکستان آئیں گے
محسن نقوی نے صدر پزشکیان سے ملاقات میں پاکستان اور ایران کے تعلقات کو مضبوط، دیرینہ اور ناقابل شکست قرار دیتے ہوئے تہران کے ساتھ تعلقات کو مزید وسیع کرنے کے لیے اسلام آباد کے عزم کا اظہار کیا
صدر پزشکیان نے بھی کہا کہ پاکستان اور ایران کے باہمی تعلقات دونوں ممالک کے قومی مفادات کے ساتھ ساتھ علاقائی امن اور سلامتی میں بھی اہم کردار ادا کرسکتے ہیں
دریائے ہرمز کے مستقبل سے متعلق اختلافات ایران اور امریکا کے درمیان معاہدے پر عمل درآمد میں بڑی رکاوٹ بنے ہوئے ہیں جبکہ ایران اور عمان آبنائے ہرمز سے محفوظ گزرگاہ کے لیے ایک نئے انتظام پر مذاکرات کر رہے ہیں
ایران کا مؤقف ہے کہ آبنائے ہرمز کو مکمل طور پر کھولنے کے لیے امریکا کو اسلام آباد مفاہمتی یادداشت میں مبینہ خلاف ورزیوں کا ازالہ کرنا ہوگا اور تہران اس معاہدے کو وسیع تر تنازع کے حل کے لیے واحد جائز فریم ورک سمجھتا ہے
دوسری جانب امریکی صدر ڈونلڈ ٹرمپ نے ایران کے مذاکرات کاروں کو سخت تنقید کا نشانہ بناتے ہوئے انہیں چالاک اور بے ایمان قرار دیا ہے اور ایران کی معاشی صورتحال کو بھی شدید تنقید کا نشانہ بنایا ہے