مسی ساگا میں اپارٹمنٹ کرائے کے فراڈ سے آٹھ افراد 30 ہزار ڈالر سے محروم

مسی ساگا: پیل ریجنل پولیس نے خبردار کیا ہے کہ مسی ساگا میں اپارٹمنٹ کرائے پر دینے کے نام پر ہونے والے ایک فراڈ میں کم از کم آٹھ افراد مجموعی طور پر 30 ہزار کینیڈین ڈالر سے محروم ہو گئے ہیں۔
پولیس کے مطابق ملزمان نے آن لائن اشتہارات کے ذریعے اپارٹمنٹ کرائے پر دینے کی پیشکش کی۔ متاثرہ افراد سے پہلے اور آخری ماہ کے کرائے سمیت سیکیورٹی ڈپازٹ وصول کیا گیا، لیکن بعد میں معلوم ہوا کہ جن رہائشی یونٹس کا وعدہ کیا گیا تھا وہ یا تو کرائے کے لیے دستیاب ہی نہیں تھے یا ملزمان کا ان پر کوئی اختیار نہیں تھا۔
تحقیقات کے مطابق متاثرین کی مجموعی مالی نقصان کی رقم تقریباً 30 ہزار ڈالر تک پہنچ چکی ہے، جبکہ پولیس کو خدشہ ہے کہ متاثرہ افراد کی تعداد اس سے زیادہ بھی ہو سکتی ہے۔ حکام نے ایسے افراد سے آگے آنے کی اپیل کی ہے جو اسی نوعیت کے فراڈ کا شکار ہوئے ہوں۔
پیل ریجنل پولیس نے عوام کو مشورہ دیا ہے کہ کسی بھی رہائشی یونٹ کے لیے رقم ادا کرنے سے پہلے جائیداد کا ذاتی طور پر معائنہ کریں، مالک یا پراپرٹی منیجر کی شناخت کی تصدیق کریں، اور صرف آن لائن اشتہارات یا سوشل میڈیا پر انحصار نہ کریں۔
پولیس کا کہنا ہے کہ اس مقدمے کی تحقیقات جاری ہیں اور واقعے سے متعلق معلومات رکھنے والے افراد سے رابطہ کرنے کی درخواست کی گئی ہے۔