سنیٹر مچ میک کونل 50 روزہ علاج کے بعد اسپتال سے گھر منتقل

امریکہ کے سینئر ریپبلکن سینیٹر مچ میک کونل 50 روز سے زائد علاج اور بحالی کے بعد ری ہیبیلیٹیشن سینٹر سے اپنے گھر منتقل ہو گئے ہیں۔

کینٹکی سے تعلق رکھنے والے سینیٹر کے دفتر کی جانب سے 6 اگست کو جاری بیان میں بتایا گیا کہ میک کونل اب گھر پر رہتے ہوئے جسمانی بحالی (فزیکل تھراپی) کا عمل جاری رکھیں گے۔

اپنے بیان میں مچ میک کونل نے کہا کہ وہ اور ان کی اہلیہ ایلین چاؤ دوستوں، ساتھی قانون سازوں اور کینٹکی کے عوام کی نیک تمناؤں اور حمایت پر شکر گزار ہیں۔ انہوں نے اپنے علاج میں شریک ڈاکٹروں، نرسوں، فزیوتھراپسٹس اور اسپتال کے عملے کا بھی خصوصی شکریہ ادا کیا۔

سینیٹر کے دفتر نے یہ نہیں بتایا کہ وہ کب دوبارہ امریکی سینیٹ میں اپنی نشست سنبھالیں گے، تاہم کہا گیا ہے کہ وہ گھر پر علاج کے دوران بھی سینیٹ سے متعلق امور پر کام جاری رکھیں گے۔

مچ میک کونل امریکی سیاست کی نمایاں شخصیات میں شمار ہوتے ہیں اور طویل عرصے تک سینیٹ میں ریپبلکن جماعت کی قیادت کرتے رہے ہیں۔ ان کی صحت کے حوالے سے گزشتہ چند برسوں میں متعدد مرتبہ تشویش کا اظہار کیا گیا، جبکہ حالیہ طویل علاج نے ایک بار پھر ان کی مستقبل کی سیاسی سرگرمیوں پر توجہ مرکوز کر دی ہے