ٹرمپ کی مقبولیت میں ریکارڈ کمی، مڈٹرم انتخابات سے قبل کانگریس پر ڈیموکریٹس کو 7 پوائنٹس کی برتری، آزاد ووٹرز بھی ریپبلکنز سے دور
واشنگٹن:امریکہ میں 3 نومبر کے مڈٹرم انتخابات کے پسمنظر میں ہونے والے این بی سی نیوز کے تازہ ترین قومی سروے میں ڈیموکریٹک پارٹی کو کانگریس کا کنٹرول حاصل کرنے کی دوڑ میں ریپبلکنز پر واضح برتری حاصل ہوگئی ہے،سروے کے مطابق رجسٹرڈ ووٹرز میں 52 فیصد ڈیموکریٹس جبکہ 45 فیصد ریپبلکنز کے زیر کنٹرول کانگریس کو ترجیح دے رہے ہیں،اس طرح ڈیموکریٹس کو 7 پوائنٹس کی برتری حاصل ہے، جو گزشتہ ماہ کے سروے کے مقابلے میں 2 پوائنٹس زیادہ ہے
سروے کا سب سے اہم پہلو آزاد ووٹرز کا رجحان ہے، جن میں ڈیموکریٹس کو ریپبلکنز پر 21 پوائنٹس کی برتری حاصل ہے،یہ رجحان انتخابی سیاست میں اہمیت رکھتا ہے کیونکہ کانگریس کے کئی مقابلوں میں آزاد ووٹرز کے فیصلے نتائج پر اثر انداز ہوسکتے ہیں
صدر ڈونلڈ ٹرمپ کی کارکردگی سے عدم اطمینان بھی بڑھ گیا ہے،این بی سی نیوز کے مطابق ان کی دوسری صدارتی مدت کے دوران پہلی مرتبہ نہیں بلکہ دونوں ادوار کے مجموعی سروے ریکارڈ میں ناپسندیدگی کی شرح 60 فیصد کی نئی بلند ترین سطح پر پہنچ گئی ہے
معاشی صورتحال کے حوالے سے بھی سروے میں تشویش ناک رجحان سامنے آیا ہے،این بی سی نیوز کے 30 سالہ سروے ریکارڈ میں پہلی مرتبہ زیادہ ووٹرز نے اپنی مالی صورتحال سے عدم اطمینان ظاہر کیا ہے،51 فیصد افراد نے کہا کہ وہ اپنی مالی حالت سے مطمئن نہیں، جبکہ 49 فیصد نے اطمینان کا اظہار کیا
تاہم سروے میں ڈیموکریٹس کے لیے ایک اہم انتباہ بھی موجود ہے،رپورٹ کے مطابق ریپبلکنز کی مخالفت کرنے والے ووٹرز کی تعداد بڑھ رہی ہے، لیکن اس کا لازمی مطلب یہ نہیں کہ وہ ڈیموکریٹک پارٹی کی پالیسیوں اور قیادت سے بھی متاثر ہیں،دوسرے الفاظ میں ڈیموکریٹس کو ملنے والی حمایت کا ایک حصہ ٹرمپ اور ریپبلکنز سے عدم اطمینان کا نتیجہ ہوسکتا ہے، نہ کہ پارٹی سے مکمل وابستگی کا
یہ نتائج ایسے وقت میں سامنے آئے ہیں جب انتخابات کے ذریعے ایوانِ نمائندگان اور سینیٹ میں اکثریت کا فیصلہ ہونا ہے،اگر یہ رجحانات انتخابی نتائج میں بھی برقرار رہے تو کانگریس میں طاقت کا توازن تبدیل ہونے کا امکان پیدا ہوسکتا ہے، تاہم قومی سروے انفرادی ریاستوں اور انتخابی حلقوں کے نتائج کی حتمی پیش گوئی نہیں کرتے