حوثیوں کی مکہ اور مدینہ کو نشانہ بنانے کی تردید، سعودی عرب میں میزائلوں کے ملبے گرنے کی اطلاع
یمن کے حوثی گروپ نے مکہ مکرمہ اور مدینہ منورہ کو نشانہ بنانے کی تردید کرتے ہوئے سعودی عرب کے اس بیان کو جھوٹ قرار دیا ہے کہ دونوں مقدس شہروں کے علاقوں کی جانب آنے والے میزائلوں کو فضا میں تباہ کیا گیا،سعودی حکام کے مطابق تباہ کیے گئے دو بیلسٹک میزائلوں کا ملبہ مکہ مکرمہ، جدہ، طائف اور رابغ کے مختلف مقامات پر گرا
حوثی فوجی ترجمان یحییٰ سریع نے کہا کہ ان کی کارروائیوں کا ہدف سعودی تیل تنصیبات اور فوجی اڈے ہیں، مقدس شہروں کو نشانہ بنانے کی خبر بے بنیاد ہے،حوثیوں نے دعویٰ کیا کہ انہوں نے سعودی عرب میں تیل کی تنصیبات، پائپ لائنوں اور متعدد ہوائی اڈوں کو نشانہ بنایا، جن میں ریاض کا کنگ خالد انٹرنیشنل ایئرپورٹ، ینبع میں آرامکو کی تنصیب، رابغ کی آئل ریفائنری اور دمام کا کنگ فہد ایئرپورٹ شامل ہیں،تاہم سعودی حکام نے ان تمام اہداف کو نشانہ بنائے جانے کی تصدیق نہیں کی
سعودی قیادت میں قائم اتحاد نے کہا کہ اس نے حوثیوں کی جانب سے ینبع اور طائف کی سمت داغے گئے دو بیلسٹک میزائل تباہ کر دیے،سعودی شہری دفاع نے طائف، ینبع، مکہ مکرمہ اور جدہ میں ممکنہ خطرے کے انتباہ جاری کیے، تاہم تقریباً دس منٹ بعد بتایا کہ خطرہ ٹل گیا ہے،حکام کے مطابق ملبہ گرنے کے واقعات میں کسی جانی نقصان کی اطلاع فوری طور پر سامنے نہیں آئی
کشیدگی جنوبی یمن کے شہر عدن تک بھی پھیل گئی ہے،یمن کی بین الاقوامی طور پر تسلیم شدہ حکومت نے الزام لگایا کہ حوثیوں نے ساحلی محافظوں کی تنصیبات پر تین بیلسٹک میزائل داغے،حکومت کی وزارت داخلہ کے مطابق دو میزائل ساحلی محافظوں کے ہیڈکوارٹر اور تیسرا التواہی کے علاقے میں واقع ایک عمارت سے ٹکرایا،حوثی ترجمان نے اس کے برعکس دعویٰ کیا کہ ان کی کارروائیوں کا ہدف سعودی حمایت یافتہ فوجی اجتماع اور بحری اڈہ تھا
تازہ حملوں سے اقوام متحدہ کی ثالثی میں 2022 میں طے پانے والی جنگ بندی مزید کمزور ہو گئی ہے، جس کے بعد سعودی قیادت میں قائم اتحاد اور حوثیوں کے درمیان سرحد پار حملوں میں بڑی حد تک کمی آئی تھی،حوثی یمن کے دارالحکومت صنعاء اور ملک کے شمالی حصوں پر قابض ہیں، جبکہ سعودی عرب یمن کی بین الاقوامی طور پر تسلیم شدہ حکومت کی حمایت کرتا ہے،خطے میں ایران کے خلاف امریکہ اور اسرائیل کی جنگ کے پس منظر میں یہ نئی کشیدگی تنازعے کو مزید پھیلانے کا خدشہ پیدا کر رہی ہے