مکہ مکرمہ کی جانب حوثیوں کا ڈرون حملہ، سعودی عرب کی ’ریڈ لائن‘ کی وارننگ
سعودی قیادت میں یمن کے حوثیوں کے خلاف قائم اتحاد نے الزام عائد کیا ہے کہ حوثیوں نے مقدس شہر مکہ مکرمہ کی جانب ایک ڈرون بھیجا جسے سعودی فضائی دفاع نے شہر کی ممنوعہ فضائی حدود میں داخل ہونے سے پہلے ہی مار گرایا۔ سعودی اتحاد نے خبردار کیا ہے کہ مکہ مکرمہ، مسجد الحرام اور زائرین کی سلامتی پر کوئی سمجھوتہ نہیں کیا جائے گا
سعودی اتحاد کے ترجمان ترکی المالکی کے مطابق ڈرون کو منگل کی شام مکہ مکرمہ کے جنوب میں روکا گیا اور تباہ کیا گیا، جبکہ اس کا ملبہ شہر کے جنوب میں گرا۔ سعودی حکام نے اس واقعے کو انتہائی سنگین قرار دیتے ہوئے کہا ہے کہ مقدس مقامات اور زائرین کی سلامتی ان کے لیے ’’ریڈ لائن‘‘ ہے
حوثیوں نے سعودی عرب کے اس الزام کو مسترد کرتے ہوئے کہا ہے کہ انہوں نے مکہ مکرمہ یا کسی مقدس مقام کو نشانہ نہیں بنایا۔ اس طرح واقعے کے حوالے سے دونوں جانب کے دعوے مختلف ہیں اور حوثیوں کی جانب سے مکہ کو نشانہ بنانے کی آزادانہ طور پر تصدیق نہیں ہوئی
یہ واقعہ ایسے وقت پیش آیا ہے جب سعودی عرب اور حوثیوں کے درمیان لڑائی میں تیزی آ گئی ہے اور سعودی سرزمین پر ڈرون اور میزائل حملوں کے واقعات میں اضافہ ہوا ہے سعودی اتحاد کا کہنا ہے کہ مکہ مکرمہ کی جانب ڈرون بھیجا جانا موجودہ کشیدگی میں ایک انتہائی حساس پیش رفت ہے
سعودی حکام نے حوثیوں کے خلاف مزید ’’بازدار کارروائی‘‘ کا انتباہ بھی دیا ہے اس واقعے سے خطے میں پہلے سے جاری کشیدگی مزید بڑھنے کا خدشہ پیدا ہوا ہے، خصوصاً ایسے وقت میں جب یمن، سعودی عرب اور بحیرہ احمر کے اطراف فوجی سرگرمیاں تیز ہو رہی ہیں
مکہ مکرمہ مسلمانوں کا مقدس ترین شہر ہے اور مسجد الحرام میں دنیا بھر سے لاکھوں مسلمان عمرہ اور حج کے لیے آتے ہیں اسی وجہ سے مقدس شہر کے قریب کسی بھی فوجی کارروائی یا فضائی خطرے کو انتہائی حساس معاملہ سمجھا جاتا ہے
اس واقعے پر پاکستان سمیت متعدد ممالک اور اسلامی تعاون تنظیم نے بھی تشویش اور مذمت کا اظہار کیا ہے پاکستان نے سعودی عرب کے ساتھ یکجہتی کا اظہار کرتے ہوئے تمام فریقوں پر زور دیا ہے کہ وہ زیادہ سے زیادہ تحمل کا مظاہرہ کریں اور خطے کو مزید کشیدگی کی طرف جانے سے روکیں