ہالی ووڈ کے معروف اداکار ٹام اسکریٹ 93 برس کی عمر میں انتقال کر گئے، ’ایلین‘ اور ’ٹاپ گن‘ میں یادگار کردار ادا کیے
ہالی ووڈ کے سینئر امریکی اداکار ٹام اسکریٹ 93 برس کی عمر میں انتقال کر گئے وہ سائنس فکشن فلم ’ایلین‘، جنگی اور ایکشن فلم ’ٹاپ گن‘ اور مشہور فلم ’ایم اے ایس ایچ‘ میں اپنے یادگار کرداروں کے باعث دنیا بھر میں پہچانے جاتے تھے ان کے اہل خانہ کے مطابق اداکار بدھ کے روز طبعی وجوہات کی بنا پر انتقال کر گئے
ٹام اسکریٹ کا شمار ان اداکاروں میں ہوتا تھا جنہوں نے 6 دہائیوں سے زائد عرصے تک فلم اور ٹیلی وژن کی دنیا میں کام کیا ان کا فنی سفر 1960 کی دہائی میں شروع ہوا اور وہ 2020 کی دہائی تک مختلف فلموں اور ٹیلی وژن منصوبوں میں نظر آتے رہے انہوں نے مرکزی کرداروں کے ساتھ معاون کرداروں میں بھی اپنی اداکاری کی صلاحیتوں کا لوہا منوایا
25 اگست 1933 کو امریکی شہر ڈیٹرائٹ میں پیدا ہونے والے ٹام اسکریٹ نے اداکاری سے پہلے امریکی فضائیہ میں خدمات انجام دیں انہوں نے 1962 میں فلم ’وار ہنٹ‘ سے اپنے فلمی کیریئر کا آغاز کیا، جس میں ان کے ساتھ رابرٹ ریڈفورڈ بھی موجود تھے بعد ازاں اسکریٹ نے مختلف موضوعات پر بننے والی فلموں میں کام کرتے ہوئے اپنی الگ پہچان بنائی
1970 میں ہدایت کار رابرٹ آلٹمین کی جنگی طنزیہ فلم ’ایم اے ایس ایچ‘ میں امریکی فوج کے ایک سرجن کا کردار ان کی شہرت میں اضافے کا سبب بنا یہ فلم کوریا کی جنگ کے پس منظر میں بنائی گئی تھی اور اس میں جنگ کی ہولناکیوں کے ساتھ فوجی زندگی کے مختلف پہلوؤں کو طنزیہ انداز میں پیش کیا گیا تھا فلم کو آسکر ایوارڈز کے لیے 5 نامزدگیاں بھی ملیں
1979 میں ہدایت کار رڈلی اسکاٹ کی سائنس فکشن اور خوفناک فلم ’ایلین‘ میں انہوں نے خلائی جہاز کے کپتان ڈلاس کا کردار ادا کیا۔ فلم میں خلائی جہاز کا عملہ ایک خطرناک خلائی مخلوق سے سامنا کرتا ہے اسکریٹ کی سنجیدہ اور حقیقت سے قریب اداکاری نے فلم کے خوف اور تجسس کو مؤثر انداز میں پیش کرنے میں مدد دی یہ فلم سائنس فکشن سنیما کی اہم ترین فلموں میں شمار ہونے لگی اور اس نے اس صنف کی آئندہ فلموں پر بھی اثر ڈالا
اسکریٹ کو فلم ’ایلین‘ کی کہانی کا ایک پہلو خاص طور پر پسند تھا ان کے مطابق فلم میں خاتون کردار رپلی، جسے سگورنی ویور نے ادا کیا، بالآخر کہانی کی مرکزی ہیرو بن کر سامنے آتی ہے اسکریٹ کا کہنا تھا کہ انہیں مضبوط خواتین کرداروں کا تصور پسند تھا، جو مشکل حالات میں فیصلے کرنے اور دوسروں کی رہنمائی کرنے کی صلاحیت رکھتی ہوں
1986 میں ریلیز ہونے والی مشہور ایکشن فلم ’ٹاپ گن‘ میں اسکریٹ نے امریکی بحریہ کے ہوا بازوں کے تربیت کار کمانڈر مائیک وائپر میٹکاف کا کردار ادا کیا فلم میں ٹام کروز نے نوجوان لڑاکا پائلٹ کا کردار نبھایا تھا، جبکہ اسکریٹ کا کردار تجربہ کار افسر اور استاد کے طور پر نمایاں تھا فلم کی عالمی کامیابی نے انہیں نئی نسل کے ناظرین میں بھی مقبول بنا دیا
ان کی دیگر قابل ذکر فلموں میں ’دی ٹرننگ پوائنٹ‘، ’اسٹیل میگنولیاز‘، ’اے ریور رنز تھرو اٹ‘، ’دی ڈیڈ زون‘، ’پولیٹرجسٹ تھری‘، ’کانٹیکٹ‘، ’ٹیرز آف دی سن‘ اور ’ٹیڈ‘ شامل ہیں ان فلموں میں انہوں نے مختلف نوعیت کے کردار ادا کیے، جس سے ان کی فنی استعداد کا اندازہ ہوتا ہے
فلموں کے علاوہ ٹیلی وژن پر بھی اسکریٹ نے نمایاں کامیابی حاصل کی 1992 سے 1996 تک نشر ہونے والی امریکی ڈراما سیریز ’پکٹ فینسز‘ میں انہوں نے ایک چھوٹے امریکی قصبے کے پولیس شیرف جمی بروک کا کردار ادا کیا اس کردار پر انہیں 1993 میں بہترین اداکار کا ایمی ایوارڈ ملا، جبکہ اگلے سال بھی اسی کردار کے لیے نامزد کیا گیا
اسکریٹ کی ذاتی زندگی میں بھی خاندان کو اہم مقام حاصل تھا ان کے 5 بچے تھے اور انہوں نے اپنی زندگی میں 3 شادیاں کیں اہل خانہ نے اپنے بیان میں انہیں مزاح، تجسس، دانائی، سخاوت اور محبت کرنے والی شخصیت قرار دیا ان کے مطابق اسکریٹ کو تخلیقی صلاحیتوں، کہانی سنانے، سابق فوجیوں کی مدد، قدرتی ماحول اور دوسروں کو اپنی آواز دنیا تک پہنچانے میں مدد دینے سے گہری دلچسپی تھی
ٹام اسکریٹ کی وفات سے ہالی ووڈ ایک ایسے فنکار سے محروم ہو گیا جس نے کئی نسلوں کے فلم بینوں کو اپنی اداکاری سے متاثر کیا ان کی فلمیں اور ٹیلی وژن کردار ان کے طویل فنی سفر کی یادگار رہیں گے
