روس میں ممکنہ طاعون کے کیس پر ٹرمپ کا پیوٹن سے جلد بات کرنے کا اعلان
امریکی صدر ڈونلڈ ٹرمپ نے کہا ہے کہ وہ روسی صدر ولادیمیر پیوٹن سے روس میں ممکنہ نمونیا طاعون کے ایک کیس پر جلد ٹیلی فون پر بات کریں گے،ٹرمپ نے وائٹ ہاؤس میں صحافیوں سے گفتگو کرتے ہوئے کہا کہ اس معاملے پر امریکا روس کے ساتھ ’’بہت گہری بات چیت‘‘ کر رہا ہے اور ممکنہ طور پر بدھ کو مزید معلومات سامنے لائی جائیں گی
یہ معاملہ سائبیریا کے ایک اینٹی پلَیگ تحقیقی ادارے کی ایک خاتون ملازمہ کی موت کے بعد سامنے آیا ہے،روسی حکام نے اس کی موت کو نامعلوم وجہ سے ہونے والے نمونیا سے منسوب کیا ہے، تاہم صحت کے حکام ممکنہ نمونیا طاعون کے خدشے کی تحقیقات کر رہے ہیں
عالمی ادارۂ صحت نے کہا ہے کہ اس وقت روس سے باہر اس بیماری کے پھیلنے کا خطرہ بہت کم ہے،عالمی ادارے کے مطابق وہ روسی حکام سے رابطے میں ہے اور صورتحال پر نظر رکھے ہوئے ہے
ٹرمپ نے ایک روز قبل بھی کہا تھا کہ امریکا ضرورت پڑنے پر روس کی مدد کے لیے تیار ہے،انہوں نے بیماری کو سنگین قرار دیتے ہوئے کہا کہ واشنگٹن اس معاملے پر روسی حکام سے رابطے میں ہے
امریکی صدر کی جانب سے پیوٹن سے براہ راست بات کرنے کا اعلان ایسے وقت میں سامنے آیا ہے جب روسی حکام متاثرہ ادارے اور خاتون ملازمہ کی موت سے متعلق طبی شواہد کا جائزہ لے رہے ہیں،فی الحال اس بات کی تصدیق نہیں ہوئی کہ مذکورہ موت واقعی طاعون کے باعث ہوئی تھی