ہیملٹن میں امیگرنٹس مخالف تنظیم کی کانفرنس کی بکنگ منسوخ، تنظیم نے تقریب جاری رکھنے کا اعلان کردیا
ہیملٹن میں امیگرنٹس مخالف تنظیم ڈومینین سوسائٹی آف کینیڈا کی قومی کانفرنس کے لیے بک کیے گئے مقام کی انتظامیہ نے بکنگ منسوخ کردی ہے تنظیم نے 29 اگست 2026 کو ہیملٹن میں اپنی قومی کانفرنس منعقد کرنے کا اعلان کیا تھا، تاہم مقام کی بکنگ منسوخ ہونے کے بعد کانفرنس کے انعقاد کے حوالے سے صورتحال تبدیل ہوگئی ہے
ڈومینین سوسائٹی نے کانفرنس کا نام ڈوم کون 2026 رکھا ہے تنظیم کی جانب سے کہا گیا ہے کہ مخالفین کی جانب سے دباؤ کے باوجود کانفرنس منعقد کرنے کا منصوبہ برقرار ہے اور شرکا کو مقام سے متعلق مزید معلومات فراہم کی جائیں گی تنظیم کے سربراہ ڈینیئل ٹائرے نے بھی اعلان کیا ہے کہ تقریب مقررہ تاریخ پر جاری رہے گی
کانفرنس کے خلاف ہیملٹن میں مختلف تنظیموں اور شہری گروہوں کی جانب سے شدید احتجاج کیا گیا ان کا کہنا ہے کہ ڈومینین سوسائٹی کے نظریات امیگرنٹس اور نسلی اقلیتوں کے خلاف ہیں اور ایسے خیالات کو فروغ دینے کے لیے مقامی مقامات فراہم نہیں کیے جانے چاہییں
ہیملٹن انسداد نسل پرستی مرکز سمیت مختلف گروہوں نے مقامی کاروباری اداروں اور تقریبات کے مقامات سے اپیل کی تھی کہ وہ ڈومینین سوسائٹی کو اپنی سہولیات فراہم نہ کریں۔ ان تنظیموں نے خدشہ ظاہر کیا تھا کہ سوسائٹی کسی دوسرے نام کے ذریعے بھی مقام حاصل کرنے کی کوشش کرسکتی ہے
ہیملٹن کی میئر اینڈریا ہورواتھ نے بھی مقامی کاروباری اداروں اور تقریبات کے مقامات کو خط لکھ کر ڈومینین سوسائٹی کے بارے میں اپنے تحفظات سے آگاہ کیا تھا۔ میئر نے واضح کیا کہ شہر کی ملکیتی سہولیات اس تنظیم کو کرائے پر نہیں دی جائیں گی اور ہیملٹن میں نفرت، نسل پرستی اور امتیازی سلوک کے لیے کوئی جگہ نہیں ہونی چاہیے
ڈومینین سوسائٹی خود کو کینیڈین قوم پرستی اور امیگریشن پالیسیوں میں بڑی تبدیلیوں کی حامی تنظیم کے طور پر پیش کرتی ہے، جبکہ اس کے ناقدین اسے امیگرنٹس مخالف اور نسل پرستانہ خیالات رکھنے والی تنظیم قرار دیتے ہیں تنظیم کی جانب سے امیگرنٹس کی بڑی تعداد کو کینیڈا سے واپس بھیجنے کی پالیسی کی حمایت بھی کی جاتی ہے
کانفرنس کے اعلان کردہ مقررین میں آسٹریا سے تعلق رکھنے والے مارٹن سیلنر بھی شامل ہیں۔ ان کی شرکت نے بھی کانفرنس کے خلاف اعتراضات کو مزید بڑھا دیا ہے
ہیملٹن پولیس کا کہنا ہے کہ وہ ممکنہ احتجاج، عوامی خلل اور کسی بھی ممکنہ مجرمانہ سرگرمی سے نمٹنے کے لیے صورتحال پر نظر رکھے ہوئے ہے پولیس نے حفاظتی منصوبہ بندی کی مزید تفصیلات فراہم نہیں کیں
بکنگ منسوخ ہونے کے بعد ڈومینین سوسائٹی نے اشارہ دیا ہے کہ کانفرنس کو ہیملٹن سے باہر کسی قریبی مقام پر منتقل کیا جاسکتا ہے تاہم نئے مقام کی مکمل تفصیلات تاحال عام نہیں کی گئی ہیں