عمران خان کی جیل واپسی پر پنجاب اسمبلی میں ہنگامہ، اپوزیشن کا شدید احتجاج
عمران خان کو اسپتال منتقل کیے جانے کے چند گھنٹے بعد دوبارہ اڈیالہ جیل بھیجے جانے کے معاملے پر پنجاب اسمبلی میں شدید ہنگامہ آرائی ہوئی۔ تحریک انصاف کے ارکان نے حکومت کے خلاف احتجاج کرتے ہوئے الزام عائد کیا کہ سپریم کورٹ کے حکم پر عمل نہیں کیا گیا
عمران خان کو جمعرات اور جمعہ کی درمیانی شب اڈیالہ جیل سے طبی معائنے کے لیے منتقل کیا گیا تھا حکام کے مطابق ان کا طبی معائنہ پاکستان انسٹی ٹیوٹ آف میڈیکل سائنسز میں کیا گیا، جہاں ماہر ڈاکٹروں نے انہیں طبی طور پر جیل میں رہنے کے لیے موزوں قرار دیا، جس کے بعد انہیں تقریباً صبح پانچ بجے دوبارہ اڈیالہ جیل منتقل کردیا گیا
تحریک انصاف کے ارکان کا مؤقف تھا کہ سپریم کورٹ نے عمران خان کو شفا انٹرنیشنل اسپتال منتقل کرنے کی ہدایت کی تھی، لیکن انہیں وہاں داخل کرنے کے بجائے سرکاری اسپتال لے جایا گیا اور طبی معائنے کے بعد واپس جیل بھیج دیا گیا پارٹی نے اس اقدام کو عدالتی حکم کی خلاف ورزی قرار دیتے ہوئے سپریم کورٹ سے رجوع کرنے کا اعلان بھی کیا ہے
پنجاب اسمبلی میں اپوزیشن ارکان نے اس معاملے پر شدید احتجاج کیا اور حکومت سے وضاحت طلب کی اجلاس کے دوران عمران خان کی صحت، طبی سہولیات اور جیل میں ان کے حالات سے متعلق بھی سوالات اٹھائے گئے
تحریک انصاف کی جانب سے یہ مؤقف بھی سامنے آیا کہ عمران خان کو اسپتال میں مکمل طبی نگرانی میں رکھا جانا چاہیے تھا۔ پارٹی رہنماؤں نے کہا کہ عدالت کے حکم کا مقصد صرف طبی معائنہ نہیں بلکہ عمران خان کو ضرورت کے مطابق مکمل علاج اور طبی نگرانی فراہم کرنا تھا
حکومت کی جانب سے وضاحت دی گئی کہ شفا انٹرنیشنل اسپتال کے باہر تحریک انصاف کے کارکنوں کی موجودگی اور سکیورٹی صورتحال کے باعث عمران خان کو پاکستان انسٹی ٹیوٹ آف میڈیکل سائنسز منتقل کیا گیا۔ اطلاعات کے مطابق طبی معائنے میں آنکھوں کے ماہر، دل کے ماہر اور معالج سمیت مختلف ڈاکٹروں نے حصہ لیا جبکہ عمران خان کی بہن عظمیٰ خان بھی طبی معائنے کے دوران موجود تھیں
عمران خان کی بہنوں اور ذاتی معالج کی جانب سے بھی ان کی صحت اور جیل میں دستیاب طبی سہولیات پر تشویش کا اظہار کیا گیا۔ تحریک انصاف نے حکومت پر عمران خان کے ساتھ مناسب طبی اور انسانی سلوک نہ کرنے کا الزام عائد کیا ہے، جبکہ حکومت ان الزامات کو مسترد کرتے ہوئے کہتی ہے کہ انہیں ضرورت کے مطابق طبی سہولیات فراہم کی جارہی ہیں
اس معاملے نے سیاسی کشیدگی مزید بڑھا دی ہے اور تحریک انصاف نے عدالتی حکم پر عملدرآمد کے لیے قانونی کارروائی آگے بڑھانے کا اعلان کیا ہے