امریکی صدر کی کینیڈا پر تنقید
لاس ویگاس: امریکی صدر ڈونلڈ ٹرمپ نے ریاست نیواڈا کے شہر لاس ویگاس میں ایک عوامی اجتماع سے خطاب کرتے ہوئے کینیڈا کی قیادت کو شدید تنقید کا نشانہ بنایا اور کہا کہ وہ کینیڈا کے عوام سے محبت کرتے ہیں، لیکن وہاں کی قیادت سخت رویہ اختیار کیے ہوئے ہے۔
امریکی صدر نے اپنی تقریر کے دوران امریکہ کی تجارتی پالیسیوں کا دفاع کرتے ہوئے کہا کہ محصولات نے امریکی معیشت کو مضبوط بنایا ہے۔ انہوں نے ایک بار پھر کینیڈا کے ساتھ جاری تجارتی اختلافات کا ذکر کیا اور کہا کہ دونوں ممالک کے درمیان پیدا ہونے والی کشیدگی کی ذمہ داری کینیڈا کی قیادت پر عائد ہوتی ہے۔
ٹرمپ کے اس بیان کو ایسے وقت میں سامنے آنے والا اہم سیاسی پیغام قرار دیا جا رہا ہے جب امریکہ اور کینیڈا کے درمیان محصولات اور تجارت کے معاملات پر اختلافات بدستور جاری ہیں۔ مبصرین کے مطابق اس قسم کے بیانات دونوں ممالک کے تعلقات پر مزید اثرات مرتب کر سکتے ہیں، خصوصاً ایسے وقت میں جب دونوں حکومتیں تجارتی معاملات پر مذاکرات بھی کر رہی ہیں۔