چار نشستیں خالی، پھر بھی صرف تین ضمنی انتخابات کیوں؟

چار نشستیں خالی، پھر بھی صرف تین ضمنی انتخابات کیوں؟

کینیڈا میں اس وقت وفاقی پارلیمان کی چار نشستیں خالی ہیں، لیکن وزیرِاعظم مارک کارنی نے صرف تین حلقوں میں 31 اگست کو ضمنی انتخابات کرانے کا اعلان کیا ہے۔ سیاسی تجزیہ کاروں کے مطابق یہ فیصلہ صرف انتظامی نہیں بلکہ ایک اہم انتخابی حکمتِ عملی بھی ہے۔
خالی نشستوں میں نارتھ وینکوور–کیپی لانو (برٹش کولمبیا)، بیچز–ایسٹ یارک (اونٹاریو) اور شیکوتیمی–لے فیورڈ (کیوبیک) میں انتخابات ہوں گے، جبکہ سینٹ ہیاسنتھ–باگوٹ–ایکٹن (کیوبیک) کی نشست پر فی الحال انتخاب نہیں کرایا جا رہا۔
لبرل پارٹی کو نارتھ وینکوور اور بیچز–ایسٹ یارک میں نسبتاً محفوظ پوزیشن حاصل ہے، اس لیے وہ ان حلقوں پر کم وسائل خرچ کر کے اپنی اضافی انتخابی اخراجات کی گنجائش (Spending Limit) کو کیوبیک کے سخت مقابلے والے حلقے شیکوتیمی–لے فیورڈ میں منتقل کر سکتی ہے، جہاں لبرل، کنزرویٹو اور بلاک کیوبیکوا کے درمیان سخت مقابلے کی توقع ہے۔
اگر چوتھے حلقے سینٹ ہیاسنتھ–باگوٹ–ایکٹن میں بھی ایک ہی روز انتخاب ہوتا تو بلاک کیوبیکوا کو بھی اضافی اخراجاتی گنجائش مل جاتی، جسے وہ شیکوتیمی–لے فیورڈ میں استعمال کر سکتی تھی۔ تجزیہ کاروں کا کہنا ہے کہ اسی امکان سے بچنے کے لیے حکومت نے چوتھے حلقے میں ضمنی انتخاب مؤخر کیا ہے۔
اگرچہ حکومت نے اس فیصلے کو معمول کا انتخابی شیڈول قرار دیا ہے، لیکن مبصرین کا خیال ہے کہ اس حکمتِ عملی سے لبرل پارٹی کو اہم مقابلے والے حلقے میں مالی اور تنظیمی برتری حاصل ہو سکتی ہے۔