مغربی امریکہ شدید گرمی کی لپیٹ میں، کئی شہروں میں ریکارڈ درجۂ حرارت، جنگلاتی آگ نے انخلا پر مجبور کر دیا
امریکہ کے مغربی حصے میں ایک اور شدید گرمی کی لہر نے معمولاتِ زندگی کو متاثر کر دیا ہے۔ ہفتے کے روز متعدد شہروں میں درجۂ حرارت نے نئے ریکارڈ قائم کیے یا گزشتہ ریکارڈ کے قریب پہنچ گیا، جبکہ بعض علاقوں میں جنگلاتی آگ کے باعث آبادیوں کو فوری طور پر محفوظ مقامات پر منتقل کرنا پڑا۔
ریاست کیلیفورنیا کے جنوبی علاقوں میں محکمۂ موسمیات نے شدید گرمی کے انتباہات جاری کرتے ہوئے شہریوں کو ہدایت کی ہے کہ وہ غیر ضروری طور پر دھوپ میں نکلنے سے گریز کریں، زیادہ پانی پئیں اور ہیٹ اسٹروک یا گرمی سے پیدا ہونے والی بیماریوں کی علامات پر فوری توجہ دیں۔
دوسری جانب ایریزونا کے شہر فینکس اور ریاست مونٹانا کے مختلف علاقوں میں درجۂ حرارت نے روزانہ کی بنیاد پر نئے ریکارڈ قائم کیے، جبکہ ریاست واشنگٹن کے شہر اسپوکین کے نواح میں جنگلاتی آگ تیزی سے پھیلنے کے باعث متعدد علاقوں سے انخلا کے احکامات جاری کیے گئے۔
ماہرین موسمیات کا کہنا ہے کہ مغربی امریکہ میں بار بار آنے والی شدید گرمی کی لہریں، خشک موسم اور تیز ہوائیں جنگلاتی آگ کے خطرات میں مسلسل اضافہ کر رہی ہیں، جس کے باعث آنے والے دنوں میں بھی صورتحال تشویش ناک رہنے کا امکان ہے۔
حکام نے عوام سے اپیل کی ہے کہ وہ موسمی انتباہات پر سختی سے عمل کریں، بزرگوں، بچوں اور دائمی بیماریوں میں مبتلا افراد کا خصوصی خیال رکھیں، اور جنگلاتی آگ سے متاثرہ علاقوں میں مقامی انتظامیہ کی ہدایات پر فوری عمل کریں