مادورو کے خلاف امریکی عدالت میں مقدمہ جون 2027 سے شروع ہوگا
، سابق وینزویلا صدر نے الزامات مسترد کر دیے
نیویارک: امریکی وفاقی عدالت نے وینزویلا کے سابق صدر نکولس مادورو اور ان کی اہلیہ سیلیا فلورس کے خلاف منشیات اسمگلنگ سے متعلق مقدمے کی باقاعدہ سماعت کی تاریخ یکم جون 2027 مقرر کر دی ہے۔
امریکی استغاثہ کا الزام ہے کہ مادورو اور ان کی اہلیہ نے طویل عرصے تک منشیات کی اسمگلنگ کی سازش میں کردار ادا کیا۔ دونوں ملزمان نے الزامات سے انکار کرتے ہوئے خود کو بے قصور قرار دیا ہے۔
مادورو کے وکلا نے مؤقف اختیار کیا ہے کہ وہ ایک سابق سربراہِ مملکت ہونے کے ناطے قانونی تحفظ رکھتے ہیں اور وہ مقدمے کو خارج کرنے کی درخواست دائر کرنے کا ارادہ رکھتے ہیں۔ دفاعی ٹیم نے ان کی گرفتاری اور امریکہ منتقلی کے قانونی جواز کو بھی چیلنج کرنے کا عندیہ دیا ہے۔
عدالت نے مقدمے سے پہلے قانونی درخواستوں، شواہد کے تبادلے اور دیگر کارروائیوں کے لیے بھی شیڈول طے کیا ہے۔ یہ مقدمہ ایک سابق غیر ملکی سربراہِ مملکت کے خلاف امریکہ میں چلنے والے انتہائی اہم مقدمات میں شمار کیا جا رہا ہے۔