ٹرمپ کے ٹیرف خطرے پر ڈگ فورڈ کا سخت مؤقف
، کارنی حکومت سے کینیڈا کے مفادات کے دفاع کا مطالبہ
اونٹاریو: اونٹاریو کے وزیرِاعلیٰ ڈگ فورڈ نے امریکی صدر ڈونلڈ ٹرمپ کی جانب سے کینیڈین مصنوعات پر نئے محصولات کی دھمکی کے بعد وزیراعظم مارک کارنی پر زور دیا ہے کہ وہ امریکہ کے ساتھ مذاکرات میں کینیڈا کے مفادات کا مضبوطی سے دفاع کریں۔
فورڈ کا کہنا ہے کہ اگر امریکہ کینیڈین برآمدات پر نئے محصولات عائد کرتا ہے تو کینیڈا کو بھی جواب دینے کے لیے تیار رہنا چاہیے۔ انہوں نے کہا کہ حکومت کو ایسی حکمتِ عملی اختیار کرنی چاہیے جس سے کینیڈین کاروبار، کارکنوں اور صارفین کو تحفظ مل سکے۔
یہ بیان ایسے وقت میں سامنے آیا ہے جب امریکہ اور کینیڈا کے درمیان تجارتی مذاکرات میں دوبارہ کشیدگی پیدا ہوئی ہے۔ امریکی صدر ٹرمپ کی جانب سے کینیڈا کی بعض مصنوعات پر 50 فیصد تک محصولات عائد کرنے کی دھمکی دی گئی ہے، جس پر کینیڈین وفاقی اور صوبائی رہنماؤں نے تشویش کا اظہار کیا ہے۔
وزیراعظم مارک کارنی نے کہا ہے کہ کینیڈا مذاکرات کے ذریعے مسئلے کا حل تلاش کرنے کی کوشش کرے گا، تاہم ملک اپنے معاشی مفادات کے تحفظ کے لیے تیار ہے۔ صوبائی وزرائے اعلیٰ بھی وفاقی حکومت سے مطالبہ کر رہے ہیں کہ امریکہ کے ساتھ بات چیت میں مضبوط موقف اپنایا جائے۔