مسابقتی کمیشن کا منصفانہ کاروباری ماحول پر زور، ڈیجیٹل مارکیٹس کے لیے بھی نئے اقدامات کی تیاری

اسلام آباد: مسابقتی کمیشن آف پاکستان (CCP) کے چیئرمین فرید احمد تارڑ نے کہا ہے کہ کمیشن کی جانب سے کی جانے والی کارروائیوں کا مقصد کاروباری شعبے میں غیر منصفانہ اور مسابقت مخالف سرگرمیوں کی حوصلہ شکنی کرنا اور تمام کاروباری اداروں کے لیے یکساں مواقع فراہم کرنا ہے۔
اسلام آباد چیمبر آف کامرس اینڈ انڈسٹری (ICCI) کے زیر اہتمام منعقدہ آگاہی سیشن سے خطاب کرتے ہوئے انہوں نے کہا کہ چینی، سیمنٹ اور اشیائے ضروریہ سمیت مختلف شعبوں میں کمیشن کی مداخلت سے ملی بھگت پر مبنی کاروباری رویوں کی روک تھام، مارکیٹ میں نظم و ضبط کے فروغ اور صارفین کے حقوق کے تحفظ میں مدد ملی ہے۔
فرید احمد تارڑ نے کہا کہ مؤثر اور صحت مند مسابقت معاشی ترقی، سرمایہ کاری، جدت اور صارفین کی فلاح کے لیے ناگزیر ہے۔ ان کا کہنا تھا کہ اس نوعیت کے آگاہی پروگرام کاروباری اداروں کو اپنے قانونی فرائض سے آگاہ کرتے ہیں، رضاکارانہ طور پر قوانین پر عملدرآمد کی حوصلہ افزائی کرتے ہیں اور منصفانہ مسابقت کے فروغ میں اہم کردار ادا کرتے ہیں۔
انہوں نے بتایا کہ مسابقتی کمیشن ڈیجیٹل مارکیٹس اور ای کامرس میں سامنے آنے والے نئے چیلنجز سے نمٹنے کے لیے بھی حکمت عملی تیار کر رہا ہے تاکہ پاکستان کا مسابقتی نظام بین الاقوامی معیار اور بہترین عالمی روایات سے ہم آہنگ رہ سکے۔
چیئرمین سی سی پی نے کہا کہ صرف قانون پر عملدرآمد کافی نہیں، بلکہ آگاہی، تعلیم اور مختلف اسٹیک ہولڈرز کی شمولیت ہی خلاف ورزیوں کی مؤثر روک تھام کا ذریعہ بن سکتی ہے۔ ان کے مطابق رضاکارانہ تعمیل ہی شفاف، منصفانہ اور سرمایہ کاری کے لیے سازگار کاروباری ماحول کی بنیاد ہے۔
انہوں نے مزید بتایا کہ کمیشن جامعات، چیمبرز آف کامرس، تجارتی تنظیموں اور دیگر متعلقہ اداروں کے تعاون سے آگاہی مہم کو مزید وسعت دے رہا ہے تاکہ ملک میں مسابقتی قوانین پر عملدرآمد کی مضبوط ثقافت کو فروغ دیا جا سکے۔
اس موقع پر اسلام آباد چیمبر آف کامرس اینڈ انڈسٹری کے صدر سردار طاہر محمود نے کہا کہ سی سی پی کے ساتھ چیمبر کا تعاون دراصل پاکستان کے معاشی مستقبل میں سرمایہ کاری کے مترادف ہے، جو شفاف، مسابقتی اور سرمایہ کار دوست کاروباری ماحول کے قیام میں اہم کردار ادا کرے گا۔