کینیڈا کی نئی آبدوزیں صرف جنگ کے لیے نہیں، آرکٹک دفاع اور سمندری نگرانی کے لیے بھی استعمال ہوں گی

کینیڈا اپنی بحریہ کی صلاحیت بڑھانے کے لیے نئی نسل کی آبدوزیں حاصل کر رہا ہے، جن کا مقصد صرف جنگی کارروائیاں نہیں بلکہ آرکٹک میں خودمختاری کا تحفظ، انٹیلی جنس اکٹھی کرنا، سمندری نگرانی، دشمن آبدوزوں کا سراغ لگانا اور اتحادی ممالک کے ساتھ مشترکہ کارروائیوں میں حصہ لینا بھی ہے۔
رپورٹ کے مطابق نئی آبدوزیں موجودہ وکٹوریہ کلاس آبدوزوں کی جگہ لیں گی۔ یہ زیادہ جدید، خاموش اور طویل فاصلے تک کارروائی کی صلاحیت رکھیں گی، جبکہ آرکٹک کی برف کے نیچے بھی آپریشن کرنے کے قابل ہوں گی۔
کینیڈین حکومت کا کہنا ہے کہ نئی آبدوزوں سے ملک کی تینوں سمندری حدود، یعنی بحرِ اوقیانوس، بحرالکاہل اور آرکٹک میں مستقل موجودگی ممکن ہوگی۔ ان کے ذریعے مشکوک سرگرمیوں کی نگرانی، دشمن کی نقل و حرکت پر نظر رکھنے اور ضرورت پڑنے پر مؤثر دفاعی کارروائی کی جا سکے گی۔
حکام کے مطابق منصوبے کے تحت 12 تک روایتی (ڈیزل الیکٹرک) آبدوزیں حاصل کی جا سکتی ہیں، جبکہ پہلی آبدوز کی فراہمی 2034 سے شروع ہونے کا ہدف رکھا گیا ہے۔