غزہ میں اسرائیلی فضائی حملوں کے نتیجے میں دو فلسطینی جاں بحق ہو گئے، جبکہ دیر البلح میں ایک اسپتال کے قریب ادویات اور طبی سامان رکھنے والے گودام تباہ ہو گئے۔
فلسطینی محکمہ صحت کے مطابق اسرائیلی حملے میں الاقصیٰ شہداء اسپتال کے لیے طبی سامان ذخیرہ کرنے والے دو گوداموں کو نشانہ بنایا گیا، جن میں گردوں کے مریضوں کے ڈائلیسس کے لیے استعمال ہونے والی ضروری اشیا بھی شامل تھیں۔ اسپتال حکام کے مطابق حملے سے دیگر گوداموں اور بیرونی مریضوں کے کلینک کو بھی نقصان پہنچا۔
اسرائیلی فوج نے دعویٰ کیا ہے کہ حملہ اسپتال کے قریب موجود حماس کے ایک ٹھکانے کو نشانہ بنانے کے لیے کیا گیا تھا، تاہم فوج نے اپنے دعوے کے حق میں کوئی ثبوت پیش نہیں کیا۔
واقعے کے بعد غزہ کے طبی حکام نے خبردار کیا ہے کہ طبی سامان کی تباہی سے پہلے ہی بحران کا شکار صحت کا نظام مزید دباؤ کا شکار ہو سکتا ہے۔