پاکستان اور ایران کے درمیان تجارت میں رکاوٹیں ختم کرنے پر زور

، بارڈر سہولیات بہتر بنانے کا فیصلہ

کوئٹہ: ایران کے قونصل جنرل برائے کوئٹہ محمد کریمی توڈاشکی نے پاکستان اور ایران کے درمیان دوطرفہ تجارت کو فروغ دینے کے لیے تجارتی رکاوٹیں دور کرنے کی ضرورت پر زور دیا ہے۔
کوئٹہ چیمبر آف کامرس اینڈ انڈسٹری (کیو سی سی آئی) کے عہدیداروں اور معروف کاروباری شخصیات سے ملاقات کے دوران ایرانی قونصل جنرل نے کہا کہ دونوں ممالک کو اعلیٰ سطح پر مؤثر اقدامات کرنے ہوں گے تاکہ تجارت کو درپیش مسائل حل کیے جا سکیں۔
انہوں نے کہا کہ ایران پاکستان کے ساتھ تجارتی تعلقات مضبوط بنانے کے لیے مکمل طور پر پرعزم ہے اور کاروباری برادری کو درپیش مشکلات کے حل کے لیے ہر ممکن تعاون فراہم کرے گا۔
محمد کریمی توڈاشکی نے کہا کہ ایران بلوچستان کی کاروباری برادری کے مسائل کو اپنے مسائل سمجھتا ہے اور انہیں حل کرنے کے لیے کوششیں جاری رکھے گا۔ انہوں نے بتایا کہ گبد-ریمندان بارڈر اور دیگر تجارتی راستوں پر سہولیات بہتر بنانے، کسٹمز کے طریقہ کار کو آسان بنانے اور تجارتی سرگرمیوں کو تیز کرنے کے لیے متعلقہ حکام سے بات چیت جاری ہے۔
کوئٹہ چیمبر آف کامرس اینڈ انڈسٹری کے صدر حاجی محمد ایوب مریانی نے مطالبہ کیا کہ گبد-ریمندان سرحدی گزرگاہ کو 24 گھنٹے کھلا رکھا جائے تاکہ درآمدات اور برآمدات بلا تعطل جاری رہیں اور تاجروں کو تاخیر اور مالی نقصان سے بچایا جا سکے۔
انہوں نے کہا کہ گبد-ریمندان بارڈر پر روزانہ سینکڑوں گاڑیوں کی آمدورفت کے باعث شدید رش پیدا ہو جاتا ہے، جس سے تجارت متاثر ہوتی ہے۔ تاجروں کا کہنا ہے کہ بہتر سرحدی انتظامات اور آسان کسٹمز نظام سے پاکستان اور ایران کے درمیان تجارتی حجم میں نمایاں اضافہ ہو سکتا ہے