مشرقِ وسطیٰ کو پاکستان کی برآمدات میں کمی،
مالی سال 2025-26 میں تجارت جنگی کشیدگی سے متاثر

اسلام آباد: مالی سال 2025-26 کے دوران مشرقِ وسطیٰ کے ممالک کو پاکستان کی برآمدات میں سالانہ بنیاد پر 2 فیصد سے زائد کمی ریکارڈ کی گئی اور برآمدات کا حجم 3.093 ارب ڈالر رہا۔ ماہرین کے مطابق اس کی بڑی وجہ خطے میں جاری جغرافیائی کشیدگی اور جنگ کے باعث تجارتی سرگرمیوں پر پڑنے والے اثرات ہیں۔
اسٹیٹ بینک آف پاکستان کے اعداد و شمار کے مطابق سعودی عرب، قطر، بحرین اور اردن کو برآمدات میں کمی آئی، جبکہ کویت کو برآمدات میں اضافہ ہوا۔ پاکستان کی سب سے بڑی علاقائی برآمدی منڈی متحدہ عرب امارات کو برآمدات تقریباً گزشتہ سال کی سطح پر برقرار رہیں۔
دوسری جانب مشرقِ وسطیٰ سے پاکستان کی درآمدات بھی 4 فیصد کم ہو کر 16.413 ارب ڈالر رہ گئیں۔ تاہم متحدہ عرب امارات، سعودی عرب اور اردن سے درآمدات میں اضافہ دیکھا گیا، جبکہ بحرین، قطر اور کویت سے درآمدات کم ہوئیں۔
رپورٹ کے مطابق پاکستان کی توانائی کی ضروریات کا تقریباً 90 فیصد حصہ متحدہ عرب امارات اور سعودی عرب سے پورا ہوتا ہے، جس کے باعث خطے میں پیدا ہونے والی سیاسی یا فوجی کشیدگی پاکستان کی تجارت اور درآمدی سرگرمیوں پر براہِ راست اثر انداز ہوتی ہے۔
اعداد و شمار کے مطابق مالی سال 2025-26 میں مشرقِ وسطیٰ کے ساتھ پاکستان کا تجارتی خسارہ 4.48 فیصد کم ہو کر 13.32 ارب ڈالر رہ گیا، جو گزشتہ مالی سال کے مقابلے میں ایک مثبت پیش رفت سمجھی جا رہی ہے، اگرچہ برآمدات میں کمی بدستور تشویش کا باعث ہے۔