انسٹاگرام رابطے نے دہلی کے میاں بیوی کو مبینہ پاکستانی جاسوسی نیٹ ورک تک پہنچا دیا، پولیس نے گرفتار کر لیا
نئی دہلی: دہلی پولیس کے خصوصی سیل نے پاکستان میں قائم ایک مبینہ جاسوسی نیٹ ورک سے روابط کے الزام میں میاں بیوی کو گرفتار کرنے کا دعویٰ کیا ہے،پولیس کے مطابق تفتیش کے دوران انسٹاگرام پر ہونے والی گفتگو اور رابطوں کے سراغ نے انہیں جوڑے تک پہنچایا
پولیس کے مطابق 25 سالہ ساحل، جو دہلی میں ایک وکیل کے معاون کے طور پر کام کرتا تھا، نے 2024 میں 21 سالہ سمیرا سے شادی کی تھی,دونوں کی ملاقات تقریباً 2 سال قبل ایک خاندانی دوست کے ذریعے ہوئی تھی،سمیرا نوئیڈا کے ایک کال سینٹر میں ملازمت کرتی تھی
پولیس کا کہنا ہے کہ سمیرا مبینہ طور پر انسٹاگرام کے ذریعے پاکستان سے تعلق رکھنے والے ایک شخص کے رابطے میں تھی،اسی شخص نے مبینہ طور پر سمیرا کو ساحل سے بھی رابطہ قائم کرنے کے لیے کہا اور دونوں کو یہ بتایا گیا کہ اس کام کے ذریعے پیسے کمائے جا سکتے ہیں
پولیس کے مطابق جوڑے پر الزام ہے کہ وہ بھارتی سم کارڈز دبئی کے راستے پاکستان بھیجتے تھے،انہیں مبینہ طور پر حساس معلومات جمع کرنے اور مزید افراد کو اس نیٹ ورک میں شامل کرنے کی ذمہ داری بھی دی گئی تھی
خصوصی سیل نے بتایا کہ انسٹاگرام پر ہونے والے رابطوں سے حاصل ہونے والی معلومات اور دیگر شواہد کی بنیاد پر تفتیش آگے بڑھائی گئی، جس کے بعد پولیس جوڑے تک پہنچی اور دونوں کو گرفتار کر لیا گیا
پولیس اب مبینہ نیٹ ورک کے دیگر ارکان، جوڑے کو دی جانے والی ہدایات اور پاکستان تک معلومات یا سم کارڈز پہنچانے کے طریقہ کار کی مزید تحقیقات کر رہی ہے،تاہم جوڑے پر عائد الزامات ابھی پولیس کے دعوے ہیں اور ان کی قانونی حیثیت کا تعین عدالتی کارروائی کے دوران ہوگا