الیگزینڈریا اوکاسیو کی سوشلسٹ شناخت پر 7 سال کی رکنیت کا خلا سامنے آنے کے بعد نئے سوالات
نیویارک سے تعلق رکھنے والی ڈیموکریٹ رکن کانگریس الیگزینڈریا اوکاسیو کورٹیز نے اس ماہ ڈیموکریٹک سوشلسٹس آف امریکا کی رکنیت دوبارہ حاصل کرلی ہے، لیکن اس انکشاف کے بعد ان کی سوشلسٹ سیاسی شناخت پر نئی بحث شروع ہوگئی ہے کہ وہ تقریباً 7 سال تک تنظیم کی باقاعدہ رکن نہیں تھیں
اوکاسیو کورٹیز نے پہلی مرتبہ 2018 میں ڈی ایس اے کی رکنیت حاصل کی تھی، جب وہ کانگریس کی امیدوار تھیں،اس وقت رکنیت ایک سال کے لیے ہوتی تھی اور اسے ہر سال خود تجدید کرنا پڑتا تھا،ان کی رکنیت 2019 میں ختم ہوگئی، لیکن اس کے بعد تقریباً 7 سال تک انہوں نے اسے دوبارہ فعال نہیں کیا
اس کے باوجود ڈی ایس اے نے اس پورے عرصے میں اوکاسیو کورٹیز کو اپنی سیاسی تحریک سے وابستہ ایک اہم شخصیت کے طور پر پیش کیا اور کئی مواقع پر انہیں تنظیم کی رکن قرار دیا،تنظیم نے ان کے انتخابی کامیابیوں پر مبارک باد بھی دی اور ان کے سیاسی مؤقف کی حمایت جاری رکھی
ڈی ایس اے کے مطابق تنظیم کی قومی قیادت کو حال ہی میں اس رکنیت کے ختم ہونے کا علم اس وقت ہوا جب اوکاسیو کورٹیز نے خود ایک موقع پر کہا کہ وہ تنظیم کے نیویارک سٹی چیپٹر کی رکن ہیں، لیکن قومی تنظیم کی رکن نہیں ہیں،اس کے بعد ریکارڈ کا جائزہ لیا گیا تو معلوم ہوا کہ ان کی قومی رکنیت 2019 میں ہی ختم ہوچکی تھی
ڈی ایس اے نے تصدیق کی ہے کہ اوکاسیو کورٹیز نے اگست 2026 میں دوبارہ رکنیت حاصل کرلی ہے اور اب وہ تنظیم کی باقاعدہ رکن ہیں
یہ معاملہ ایسے وقت میں سامنے آیا ہے جب ڈی ایس اے کی سیاسی طاقت میں نمایاں اضافہ ہوا ہے،تنظیم سے وابستہ امیدواروں نے حالیہ ڈیموکریٹک پرائمری انتخابات میں متعدد اہم کامیابیاں حاصل کی ہیں، جن میں بعض موجودہ عہدیداروں کو شکست دینا بھی شامل ہے،فلوریڈا میں اینجی نکسن کی کامیابی کو بھی تنظیم کے لیے ایک اہم سیاسی پیش رفت قرار دیا گیا ہے
اوکاسیو کورٹیز خود ڈی ایس اے کی سب سے نمایاں سیاسی شخصیات میں شمار ہوتی رہی ہیں،اگرچہ قومی تنظیم کی رکنیت کئی سال تک فعال نہیں تھی، لیکن وہ تنظیم کے سیاسی پروگرام اور اس سے وابستہ امیدواروں کے قریب رہیں،ڈی ایس اے نے ان کے ساتھ اپنا سیاسی تعلق بھی برقرار رکھا
اوکاسیو کورٹیز کے دوبارہ رکن بننے کا وقت بھی خاص توجہ حاصل کر رہا ہے کیونکہ ان کے بارے میں 2028 کے صدارتی انتخابات میں ممکنہ امیدوار بننے کی قیاس آرائیاں بڑھ رہی ہیں،ڈی ایس اے کی قومی قیادت نے بھی کہا ہے کہ 2028 سے متعلق جاری سیاسی بحث نے ان کی وابستگی کے بارے میں وضاحت سامنے لانے میں کردار ادا کیا
دوسری طرف، ناقدین کا کہنا ہے کہ سات سال تک رکنیت کی تجدید نہ کرنے کے بعد اب عین اس وقت دوبارہ رکن بننا جب ڈی ایس اے کا سیاسی اثر بڑھ رہا ہے اور اوکاسیو کورٹیز کے ممکنہ صدارتی مستقبل پر بحث ہو رہی ہے، محض اتفاق نہیں ہوسکتا،اسی تناظر میں ان کی سوشلسٹ شناخت اور تنظیم کے ساتھ ان کے دیرینہ تعلق پر نئے سوالات اٹھ رہے ہیں
تاہم دستیاب معلومات سے یہ ثابت نہیں ہوتا کہ اوکاسیو کورٹیز نے جان بوجھ کر اپنی رکنیت کے بارے میں غلط دعویٰ کیا،ڈی ایس اے نے خود وضاحت کی ہے کہ 2018 کی ایک سالہ رکنیت 2019 میں ختم ہوگئی تھی اور اس کے بعد اس کی تجدید نہیں ہوئی تھی،اب اگست 2026 میں انہوں نے دوبارہ باقاعدہ رکنیت حاصل کرلی ہے