اونٹاریو میں ہنرمند شعبوں کے لیے تقریباً ایک کروڑ ڈالر کی نئی تربیتی سرمایہ کاری
اونٹاریو حکومت نے ہنرمند پیشوں میں کارکنوں اور روزگار کے متلاشی افراد کی تربیت کے لیے تقریباً ایک کروڑ ڈالر کی نئی سرمایہ کاری کا اعلان کیا ہے اس رقم سے صوبے بھر میں چھ مختلف تربیتی منصوبوں کو مالی معاونت فراہم کی جائے گی، جن کا مقصد لوگوں کو تعمیرات، گاڑیوں کی مرمت، الیکٹرک شعبے اور دیگر اہم پیشوں میں روزگار کے لیے تیار کرنا ہے
حکومت کے مطابق اس سرمایہ کاری کے ذریعے تقریباً ایک ہزار ایک سو پچاس کارکنوں اور روزگار کی تلاش میں مصروف افراد کو ایسی تربیت فراہم کی جائے گی جن شعبوں میں ہنرمند افرادی قوت کی طلب زیادہ ہے۔ منصوبوں میں عملی تربیت کے ساتھ ساتھ مخصوص پیشوں کے لیے ضروری مہارتیں بھی سکھائی جائیں گی
نئے منصوبوں میں تعمیراتی شعبے میں روزگار کے لیے تربیت فراہم کرنے والا ایک پروگرام شامل ہے جس کی قیادت وائی ایم سی اے کرے گا اس کے علاوہ گاڑیوں کی خدمات اور مرمت سے متعلق تربیت اور نوجوانوں کو الیکٹرک شعبے میں ضروری مہارتیں فراہم کرنے والا پروگرام بھی شامل ہے
یہ سرمایہ کاری صوبے کے مہارتوں کی ترقی کے فنڈ کے تربیتی سلسلے کے تحت کی گئی ہے۔ حکومت کا کہنا ہے کہ اس فنڈ کا مقصد کارکنوں کو ایسی مہارتیں فراہم کرنا ہے جن کی موجودہ اور مستقبل کی معیشت میں ضرورت ہے، خاص طور پر تعمیرات اور ہنرمند پیشوں میں جہاں افرادی قوت کی طلب مسلسل بڑھ رہی ہے
حکومت کی جانب سے ہنرمند پیشوں میں تربیت پر زیادہ توجہ ایسے وقت میں دی جا رہی ہے جب اونٹاریو میں تعمیراتی منصوبوں، بنیادی ڈھانچے اور صنعتی سرگرمیوں کے لیے بڑی تعداد میں تربیت یافتہ کارکنوں کی ضرورت ہے۔ صوبائی حکام کا مؤقف ہے کہ نئے تربیتی مواقع نوجوانوں اور دوسرے روزگار کے متلاشی افراد کو بہتر آمدنی والے پیشوں میں داخل ہونے میں مدد دیں گے
تاہم، مہارتوں کی ترقی کے فنڈ کو ماضی میں نگرانی اور رقم کی تقسیم کے طریقہ کار پر تنقید کا سامنا بھی رہا ہے۔ صوبائی آڈیٹر جنرل نے گزشتہ سال اس بڑے فنڈ کے حوالے سے شفافیت اور جواب دہی سے متعلق خدشات اٹھائے تھے۔ اس کے باوجود حکومت کا کہنا ہے کہ ہنرمند افرادی قوت کی تیاری صوبے کی معاشی ترقی اور مستقبل کی ملازمتوں کے لیے انتہائی اہم ہے