ٹرمپ اور وائٹ ہاؤس کی سوشل میڈیا ویڈیوز سے ٹیلر سوئفٹ کے گانے ہٹا دیے گئے

واشنگٹن: امریکی صدر ڈونلڈ ٹرمپ کی انتخابی مہم اور وائٹ ہاؤس کی جانب سے سوشل میڈیا پر شیئر کی گئی متعدد ویڈیوز سے معروف امریکی گلوکارہ ٹیلر سوئفٹ کے گانے ہٹا دیے گئے ہیں۔ یہ اقدام اس وقت سامنے آیا جب ٹرمپ کی انتخابی مہم نے گزشتہ ایک ہفتے کے دوران سوئفٹ کے دو گانے اپنی ویڈیوز میں استعمال کیے تھے۔
رپورٹ کے مطابق ٹرمپ کی انتخابی مہم نے مختصر ویڈیوز کے پلیٹ فارم ٹک ٹاک پر سوئفٹ کے گانوں کو سیاسی پیغامات کے ساتھ استعمال کیا۔ ایک ویڈیو میں ان کے معروف گانوں کے عنوانات کو تبدیل شدہ سیاسی جملوں کے ساتھ پیش کیا گیا، جسے سوئفٹ کے خلاف طنزیہ انداز قرار دیا گیا۔
سوئفٹ کا گانا ’’اگست‘‘ بھی ٹرمپ کی ایک ویڈیو میں استعمال ہوا تھا، جس میں صدر ٹرمپ اور خاتونِ اول میلانیا ٹرمپ کو آتش بازی دیکھتے دکھایا گیا۔ بعد میں اس ویڈیو سے گانے کی آواز ہٹا دی گئی۔
ٹیلر سوئفٹ نے حالیہ معاملے پر عوامی طور پر کوئی بیان نہیں دیا، جبکہ وائٹ ہاؤس اور سوئفٹ کے نمائندے نے بھی فوری طور پر تبصرہ نہیں کیا۔ سوئفٹ نے 2024 کے صدارتی انتخابات میں ٹرمپ کے حریف کملا ہیرس کی حمایت کی تھی، جس کے بعد ٹرمپ نے سوشل میڈیا پر سوئفٹ کو شدید تنقید کا نشانہ بنایا تھا۔
رپورٹ کے مطابق ٹرمپ انتظامیہ اور ان کی انتخابی مہم کی جانب سے اس سے قبل بھی متعدد معروف فنکاروں کے گانے سیاسی ویڈیوز میں استعمال کیے گئے ہیں۔ گلوکارہ صابرینا کارپنٹر اور آریانا گرانڈے سمیت کئی فنکار ماضی میں ٹرمپ انتظامیہ سے اپنے گانوں کے استعمال پر اعتراض کر چکے ہیں۔
ٹیلر سوئفٹ کے گانوں کو ویڈیوز سے ہٹائے جانے کے بعد سوشل میڈیا پر بھی اس معاملے پر خاصی توجہ حاصل ہوئی ہے، تاہم یہ واضح نہیں کیا گیا کہ تمام ویڈیوز سے موسیقی ہٹانے کی قانونی کارروائی کس مخصوص بنیاد پر ہوئی۔