ہریانہ : فرید آباد میں اسکول ٹیچر کا بہیمانہ قتل، سی سی ٹی وی میں نقاب پوش حملہ آور کا 27 بار چاقو مارنے کا منظر قید

بھارت کی ریاست ہریانہ کے شہر فرید آباد میں ایک نجی اسکول کی 29 سالہ خاتون ٹیچر کو دن دہاڑے چاقو کے وار کر کے قتل کر دیا گیا، جبکہ پوری واردات اسکول میں نصب سی سی ٹی وی کیمروں میں ریکارڈ ہو گئی۔

پولیس کے مطابق مقتولہ سندھیہ، سرسوتی سینئر سیکنڈری اسکول، سکیرونا گاؤں میں بطور ٹیچر کام کرتی تھیں۔ وہ پیر کی صبح معمول کے مطابق تقریباً 9:30 بجے اسکول پہنچی تھیں کہ مبینہ طور پر 21 سالہ امیت نامی نوجوان چہرہ کپڑے سے ڈھانپ کر وہاں پہنچا اور ان سے ملاقات کا مطالبہ کیا۔

پولیس کا کہنا ہے کہ ملزم نے مبینہ طور پر سندھیہ کو زبردستی ایک جگہ لے جا کر چاقو کے متعدد وار کیے، جن کی تعداد 27 بتائی جا رہی ہے۔ حملے کے بعد ملزم موقع سے فرار ہو گیا، تاہم پولیس نے اسے دو گھنٹے کے اندر گرفتار کر لیا۔

ابتدائی تفتیش کے دوران پولیس کے مطابق ملزم نے جرم کا اعتراف کیا ہے۔ پولیس کا دعویٰ ہے کہ قتل کی وجہ مبینہ طور پر انتقام تھی، کیونکہ مقتولہ نے اس سے قبل ملزم کے خلاف ہراساں کرنے اور جنسی زیادتی کی شکایت کی تھی۔

واقعے نے ہریانہ میں خواتین کے تحفظ اور تعلیمی اداروں میں سکیورٹی کے حوالے سے سوالات اٹھا دیے ہیں۔ پولیس مزید تحقیقات کر رہی ہے تاکہ قتل کے تمام پہلوؤں کا جائزہ لیا جا سکے