امریکہ میں گورنر کے 7 اہم انتخابات، ٹرمپ کی مقبولیت اور مہنگائی اہم مسائل ، 19 ریاستوں میں موجود گورنر امیدوار نہیں، جارجیا پر امریکہ بھر کی نظریں
امریکہ کی تین درجن ریاستوں میں تین نومبر کو گورنر کے انتخابات بھی ہوں گے،ان انتخابات میں صدر ڈونلڈ ٹرمپ کی گرتی ہوئی مقبولیت اور مہنگائی ووٹروں کی ترجیحات میں سرفہرست ہیں، تاہم ریاستی سطح کے مسائل بھی انتخابی مہم پر اثرانداز ہو رہے ہیں،ان میں پانی کے وسائل، ڈیٹا سینٹرز کے قیام اور کینسر کی شرح جیسے معاملات شامل ہیں
بعض ریاستوں میں انتخابی مہم تلخی اختیار کر چکی ہے،اوہائیو میں ری پبلکن امیدوار وویک راماسوامی اور ڈیموکریٹ امیدوار ایمی ایکٹن کے درمیان مقابلے میں ایک حملہ آور اشتہار کے لیے ڈیموکریٹ امیدوار کی اپنی والدہ کو بھی استعمال کیا گیا ہے، جن کے ساتھ ان کے تعلقات کشیدہ ہیں
دوسری جانب جارجیا میں ڈیموکریٹ امیدوار کیشا لانس باٹمز کی کامیابی تاریخ رقم کر سکتی ہے،وہ امریکہ کی پہلی سیاہ فام خاتون بننے کی کوشش کر رہی ہیں جو عوام کے براہ راست ووٹوں سے کسی ریاست کی گورنر منتخب ہوں
اس وقت امریکہ کی 24 ریاستوں میں ڈیموکریٹ جبکہ 26 ریاستوں میں ری پبلکن گورنر ہیں،اگر ڈیموکریٹس کم از کم دو نشستوں کا خالص اضافہ کرنے میں کامیاب ہو گئے تو 2010 کے بعد پہلی مرتبہ گورنر کے عہدوں پر ان کی مجموعی تعداد ری پبلکنز سے زیادہ ہو جائے گی
رائٹرز کی رپورٹ میں ان سات ریاستوں کے انتخابی مقابلوں کو خصوصی اہمیت دی گئی ہے جن پر 3 نومبر کے انتخابات میں سب کی نظریں ہوں گی
ایریزونا: پانی اور امیگریشن اہم انتخابی مسائل
خشک سالی سے متاثرہ ریاست ایریزونا میں پانی کے وسائل انتخابی مہم کا مرکزی موضوع بن چکے ہیں،ڈیموکریٹ گورنر کیٹی ہابز دوبارہ انتخاب لڑ رہی ہیں، جبکہ ان کا مقابلہ ری پبلکن امیدوار اور امریکی ایوان نمائندگان کے رکن اینڈی بگز سے ہے
مہنگائی اور امیگریشن بھی اہم انتخابی موضوعات ہیں،کیٹی ہابز اس تاثر کو مسترد کرنے کی کوشش کر رہی ہیں کہ ڈیموکریٹس سرحدی سلامتی کے معاملے پر سخت مؤقف اختیار نہیں کرتے،وہ اپنی انتخابی مہم میں سرحدی سکیورٹی کے حوالے سے نسبتاً سخت مؤقف پیش کر رہی ہیں
اوہائیو: راماسوامی اور ایکٹن کی انتخابی مہم میں ذاتی حملوں کی شدت
اوہائیو میں ری پبلکن کاروباری شخصیت وویک راماسوامی اور ڈیموکریٹ ڈاکٹر ایمی ایکٹن کے درمیان گورنر کا انتخابی مقابلہ ایک متنازع اشتہاری مہم کے باعث قومی توجہ کا مرکز بن گیا ہے،راماسوامی کی انتخابی مہم کے ایک اشتہار میں ایمی ایکٹن کی والدہ ڈونا آرتھر کو دکھایا گیا ہے، جن کے اپنی بیٹی کے ساتھ تعلقات کشیدہ ہیں
اشتہار میں ڈونا آرتھر نے ایکٹن کے اس بیان کو چیلنج کیا ہے جس میں انہوں نے اپنے بچپن میں بے گھری اور جنسی زیادتی کا سامنا کرنے کا ذکر کیا تھا،اشتہار میں وہ اوہائیو کے ووٹروں سے اپیل کرتی ہیں کہ وہ ان کی بیٹی کو ووٹ نہ دیں
ایمی ایکٹن اوہائیو کے محکمہ صحت کی سابق ڈائریکٹر ہیں اور کورونا وبا کے دوران ریاستی ردعمل کی قیادت کر چکی ہیں،انہوں نے کہا ہے کہ بچپن میں ان کے سوتیلے والد نے انہیں جنسی زیادتی کا نشانہ بنایا تھا،ان کے سوتیلے والد 2004 میں انتقال کر گئے تھے،ان پر اپنی سوتیلی بیٹی کے ساتھ زیادتی کا الزام عائد ہونے کے بعد وہ ریاست چھوڑ کر فرار ہو گئے تھے اور مقدمے کا سامنا نہیں کیا تھا
اوہائیو کبھی امریکہ کی اہم سوئنگ ریاستوں میں شمار ہوتی تھی، جہاں دونوں جماعتوں کے امیدواروں کے درمیان سخت مقابلہ ہوتا تھا،تاہم 2016 میں ڈونلڈ ٹرمپ نے محنت کش طبقے کے ووٹوں کی مضبوط حمایت سے ریاست میں کامیابی حاصل کی، جس کے بعد اوہائیو کا سیاسی رجحان بتدریج ری پبلکنز کی طرف منتقل ہو گیا
اس مرتبہ انتخابی مقابلے کو اس بات کے امتحان کے طور پر دیکھا جا رہا ہے کہ آیا ڈیموکریٹس مہنگائی اور معاشی عدم اطمینان کو اپنے حق میں ووٹوں میں تبدیل کر سکتے ہیں یا نہیں،ڈیموکریٹس گزشتہ 9 گورنر انتخابات میں صرف ایک مرتبہ کامیاب ہوئے ہیں
آئیووا: کینسر کی بلند شرح انتخابی مہم کا بڑا موضوع
آئیووا میں 2006 کے بعد پہلی مرتبہ ایسا گورنر انتخاب ہو رہا ہے جس میں موجودہ گورنر دوبارہ امیدوار نہیں ہیں،ری پبلکن گورنر کم رینالڈز نے اعلان کیا ہے کہ وہ دوبارہ انتخاب نہیں لڑیں گی
ریاست کے آڈیٹر اور ڈیموکریٹ امیدوار روب سینڈ کا مقابلہ ری پبلکن کاروباری شخصیت زیک لان سے ہے،روب سینڈ اس وقت آئیووا میں ریاست گیر سطح پر منتخب ہونے والے واحد ڈیموکریٹ عہدیدار ہیں
ریاست میں کینسر کے مریضوں کی شرح ملک میں کینٹکی کے بعد دوسرے نمبر پر ہے،یہ معاملہ مہنگائی اور روزمرہ اخراجات جیسے عوامی مسائل کے ساتھ انتخابی مہم کا اہم موضوع بن گیا ہے
اس تشویش میں اضافہ ہوا ہے کہ کھادوں میں استعمال ہونے والے نائٹریٹس، کیڑے مار ادویات اور دیگر ماحولیاتی آلودگیاں کینسر کی بلند شرح میں کردار ادا کر سکتی ہیں
انتخابی مہم میں تعلیم اور حکومتی جواب دہی بھی اہم موضوعات ہیں،روب سینڈ خود کو ایک آزاد نگرانی کرنے والے امیدوار کے طور پر پیش کر رہے ہیں اور ری پبلکنز کی مالیاتی پالیسیوں اور ریاست کے نجی اسکولوں کے لیے واؤچر پروگرام پر تنقید کر رہے ہیں
دوسری جانب زیک لان نے ٹیکسوں میں کمی، والدین کو بچوں کے اسکول کے انتخاب کی آزادی اور سماجی معاملات پر زیادہ قدامت پسندانہ مؤقف اختیار کرنے کا وعدہ کیا ہے
نیواڈا: مہنگائی، پٹرول کی قیمتیں اور ڈیٹا سینٹرز انتخابی معرکے کے اہم موضوعات
نیواڈا میں انتخابی مقابلے کا بنیادی موضوع عوام کے لیے زندگی کے بڑھتے ہوئے اخراجات ہیں،ری پبلکن گورنر جو لومبارڈو کو ڈیموکریٹ امیدوار اور ریاست کے اٹارنی جنرل آرون فورڈ کی جانب سے سخت مقابلے کا سامنا ہے
ریاست کے شہریوں میں درآمدی محصولات، سیاحت کے شعبے میں سست روی اور پٹرول کی بلند قیمتوں پر تشویش پائی جاتی ہے،ان مسائل نے آرون فورڈ کے لیے موجودہ گورنر کو شکست دینے کا موقع پیدا کیا ہے، حالانکہ انتخابی مہم کے لیے چندہ جمع کرنے میں لومبارڈو کو اپنے حریف پر دو گنا برتری حاصل ہے
ڈیٹا سینٹرز کا قیام بھی انتخابی مہم کا ایک مرکزی موضوع بن چکا ہے،آرون فورڈ نے نئے ڈیٹا سینٹرز کو دی جانے والی ٹیکس رعایتیں روکنے کی تجویز پیش کی ہے،ان کا مطالبہ ہے کہ ڈیٹا سینٹرز قائم کرنے والی کمپنیاں ایسے اقدامات کریں جن سے ان منصوبوں کے باعث عام شہریوں کے بجلی کے اخراجات میں اضافہ نہ ہو،انہوں نے مصنوعی ذہانت کے پھیلاؤ سے ملازمتوں کو لاحق خطرات سے تحفظ کے لیے سخت ضابطے بنانے کی بھی حمایت کی ہے
دوسری جانب گورنر جو لومبارڈو نے ڈیٹا سینٹرز کی صنعت کو ریاست کی معاشی ترقی کے لیے اہم قرار دیا ہے،اگرچہ انہوں نے اس صنعت کو ریاست میں سرمایہ کاری پر آمادہ کرنے والی بعض ٹیکس مراعات پر پابندیاں بڑھائی ہیں، تاہم مجموعی طور پر وہ ڈیٹا سینٹرز کے قیام کے حامی ہیں
وسکونسن،ٹرمپ کی حمایت یا ان سے سیاسی فاصلہ، گورنر کے انتخاب میں اہم سوال
وسکونسن میں گورنر کے انتخاب کا ایک بنیادی سوال یہ ہے کہ آیا وہ ووٹرز جنہوں نے 2024 میں ڈونلڈ ٹرمپ اور 2020 میں جو بائیڈن کی حمایت کی تھی، اب ایسے گورنر کو منتخب کرنا چاہتے ہیں جو ری پبلکن صدر کے سیاسی ایجنڈے سے وابستہ ہو
ری پبلکن امیدوار اور امریکی ایوان نمائندگان کے تین مرتبہ منتخب ہونے والے رکن ٹام ٹفنی کو ٹرمپ کی حمایت حاصل ہے، تاہم انہوں نے اپنی انتخابی مہم میں اس تعلق کو نمایاں کرنے سے گریز کیا ہے
ان کے ڈیموکریٹ حریف اور ملواکی کاؤنٹی کے ایگزیکٹو ڈیوڈ کراؤلی نے ٹفنی کو ٹرمپ کے سیاسی ایجنڈے سے جوڑنے کی کوشش کی ہے
کانگریس میں ٹام ٹفنی نے اسلحہ رکھنے کے حقوق اور ٹیکسوں میں کمی سمیت قدامت پسندانہ پالیسیوں کی حمایت کی ہے،انہوں نے ایسی وفاقی قانون سازی کی بھی مشترکہ حمایت کی تھی جس کے تحت حمل کے تقریباً 6 ہفتے بعد زیادہ تر اسقاط حمل پر پابندی عائد ہو سکتی تھی
اس کے برعکس ڈیوڈ کراؤلی اسقاط حمل کے قانونی حق کی حمایت کرتے ہیں اور انہوں نے تولیدی حقوق کو اپنی انتخابی مہم کا اہم موضوع بنایا ہے
وسکونسن میں حمل کے 20 ہفتے گزرنے کے بعد اسقاط حمل پر پابندی ہے،اس کے علاوہ اسقاط حمل سے پہلے 24 گھنٹے انتظار کرنا اور کم عمر لڑکیوں کے لیے والدین کی رضامندی حاصل کرنا بھی ضروری ہے
مشی گن: جوکلیِن بینسن اور جان جیمز کے درمیان گورنر کا مقابلہ
مشی گن میں گورنر کا انتخاب اس سال کے سب سے زیادہ سخت مقابلوں میں شمار ہو رہا ہے،ڈیموکریٹ امیدوار جوکلیِن بینسن، جو ریاست کی اعلیٰ انتخابی عہدیدار ہیں، کا مقابلہ ری پبلکن امیدوار اور امریکی ایوان نمائندگان کے رکن جان جیمز سے ہے
دونوں امیدوار موجودہ ڈیموکریٹ گورنر گریچن وٹمر کی جگہ لینے کے لیے میدان میں ہیں، جو آئینی مدت پوری ہونے کے باعث دوبارہ انتخاب نہیں لڑ سکتیں،اس مرتبہ امریکہ میں گورنر کی 19 نشستوں پر ایسے انتخابات ہو رہے ہیں جن میں موجودہ گورنر امیدوار نہیں ہیں
مشی گن ایک ایسی ریاست ہے جہاں ڈیموکریٹس اور ری پبلکنز کے درمیان سیاسی مقابلہ انتہائی قریبی رہتا ہے،ڈونلڈ ٹرمپ نے 2016 اور 2024 کے صدارتی انتخابات میں یہ ریاست جیتی تھی، جبکہ 2020 میں جو بائیڈن یہاں کامیاب ہوئے تھے
ریاست کی سیاسی تاریخ کا ایک دلچسپ پہلو یہ بھی ہے کہ 1960 کی دہائی کے بعد سے کوئی بھی جماعت مسلسل دو مرتبہ گورنر کا انتخاب نہیں جیت سکی
جارجیا: کیشا لانس باٹمز تاریخ رقم کرنے کی دوڑ میں
جارجیا میں ری پبلکن ارب پتی کاروباری شخصیت اور شعبہ صحت سے وابستہ رِک جیکسن کا مقابلہ اٹلانٹا کی سابق میئر اور ڈیموکریٹ امیدوار کیشا لانس باٹمز سے ہے،دونوں موجودہ ری پبلکن گورنر برائن کیمپ کی جگہ لینے کے لیے انتخاب لڑ رہے ہیں
اگر کیشا لانس باٹمز کامیاب ہو جاتی ہیں تو وہ امریکہ کی تاریخ میں عوامی ووٹوں سے گورنر منتخب ہونے والی پہلی سیاہ فام خاتون ہوں گی،اس کے علاوہ جارجیا میں 25 سال سے زائد عرصے کے بعد پہلی مرتبہ ڈیموکریٹ گورنر منتخب ہو سکتا ہے
2028 کے صدارتی انتخابات میں جارجیا کو ایک اہم مقابلے کی ریاست تصور کیا جا رہا ہے، اسی لیے دونوں بڑی جماعتیں موجودہ گورنر انتخاب کو ووٹروں کے سیاسی رجحانات کا ابتدائی امتحان سمجھ رہی ہیں
رِک جیکسن اپنی انتخابی مہم پر ذاتی طور پر 100 ملین ڈالر سے زیادہ خرچ کر چکے ہیں اور عمومی طور پر صدر ڈونلڈ ٹرمپ کے سیاسی ایجنڈے کی حمایت کرتے ہیں،دوسری جانب کیشا لانس باٹمز اس متنوع ڈیموکریٹ ووٹر اتحاد کو متحرک کرنے کی کوشش کر رہی ہیں جس نے 2020 کے صدارتی انتخابات میں جو بائیڈن کو جارجیا میں کامیابی دلائی تھی
کیشا لانس باٹمز 2020 میں اس وقت قومی سطح پر نمایاں ہوئیں جب انہوں نے کورونا وبا، احتجاجی مظاہروں اور بدامنی کے دوران اٹلانٹا کی قیادت کی،ان کی سیاسی حمایت کا بنیادی مرکز اٹلانٹا کا میٹروپولیٹن علاقہ ہے، جہاں تیزی سے بڑھتی ہوئی آبادی نے ریاست کی سیاست کا نقشہ تبدیل کیا ہے، سات ریاستوں میں ڈیموکریٹ اور ری پبلکن امیدواروں کی پوزیشن
30 اکتوبر 2026 کے دستیاب پولنگ اوسط کے مطابق
ریاست ڈیموکریٹ امیدوار ری پبلکن امیدوار برتری
ایریزونا 52.4% 45.0% ڈیموکریٹ
مشی گن 53.0% 44.5% ڈیموکریٹ
جارجیا 49.5% 50.1% ری پبلکن
اوہائیو 50.1% 47.0% ڈیموکریٹ
آئیووا 53.2% 45.9% ڈیموکریٹ
نیواڈا 48.9% 47.0% ڈیموکریٹ
وسکونسن 51.8% 48.1% ڈیموکریٹ