امریکی ایوانِ نمائندگان کے انتخابات میں محاذ بدلنے لگے، ریپبلکنز دفاعی پوزیشن میں ، مشکل حلقوں سے پیچھے ہٹنے لگے
ڈیموکریٹس مزید نشستیں جیتنے کے لیے متحرک
امریکی ایوانِ نمائندگان کے وسط مدتی انتخابات سے صرف 3 ہفتے قبل ریپبلکن پارٹی نے متعدد سخت مقابلے والے حلقوں میں انتخابی اخراجات کم کر دیے ہیں، جبکہ ڈیموکریٹس ریپبلکنز کی زیرِ قیادت حلقوں میں کامیابی کے امکانات بڑھانے کے لیے اشتہاری مہم پر کروڑوں ڈالر خرچ کرنے کی تیاری کر رہے ہیں
ایسوسی ایٹڈ پریس کے مطابق ریپبلکن امیدواروں کی حمایت کرنے والے سب سے بڑے سپر پی اے سی، کانگریشنل لیڈرشپ فنڈ، نے وسط مغربی ریاستوں سے مشرقی ساحل تک پھیلے 4 انتخابی حلقوں میں اخراجات منسوخ کر دیے ہیں، تاہم ٹیکساس سے پنسلوانیا تک 16 دوسرے حلقوں میں اپنی سرمایہ کاری بڑھا دی ہے،صدر ڈونلڈ ٹرمپ کے اتحادی ایک دوسرے سپر پی اے سی نے بھی لاس ویگاس کے علاقے میں ایک سخت مقابلے والے حلقے میں اخراجات کم کرنے کا فیصلہ کیا ہے
ان فیصلوں سے واقف ریپبلکن انتخابی حکام نے نجی حکمت عملی سے متعلق گفتگو سامنے لانے کے لیے نام ظاہر نہ کرنے کی شرط پر ان تفصیلات کی تصدیق کی
دوسری جانب ڈیموکریٹک پارٹی کی انتخابی کمیٹی ریپبلکنز کے زیرِ کنٹرول حلقوں میں کامیابی کے نئے مواقع تلاش کر رہی ہے،ڈیموکریٹس آئندہ ایک ہفتے کے دوران لاکھوں ڈالر جمع کرنے کی کوشش کر رہے ہیں تاکہ انتخابی مہم کے آخری مرحلے میں اشتہارات پر رقم خرچ کی جا سکے،پارٹی رہنماؤں کا کہنا ہے کہ اس حکمت عملی کے نتیجے میں ایوانِ نمائندگان کی کم از کم 6 مزید نشستیں حاصل کی جا سکتی ہیں۔
ایسوسی ایٹڈ پریس کے مطابق انتخابی مہم کے آخری 3 ہفتوں میں مالی وسائل کی یہ تبدیلی ریپبلکنز کے دفاعی اندازِ سیاست اختیار کرنے کی نشاندہی کرتی ہے،ریپبلکن پارٹی پہلے ہی سینیٹ کے انتخابات میں اپنی توقعات کم کر چکی ہے، جبکہ ڈیموکریٹس ایوانِ نمائندگان میں اپنی نشستوں کی تعداد بڑھانے کے لیے زیادہ جارحانہ انتخابی حکمت عملی اپنا رہے ہیں
یہ تبدیلیاں اس بات کی عکاسی کرتی ہیں کہ انتخابی مہم کے آخری دنوں میں دونوں جماعتیں اپنے محدود مالی وسائل ان حلقوں پر مرکوز کر رہی ہیں جہاں مقابلہ سخت ہے،ریپبلکنز بعض محاذوں پر اخراجات کم کرکے اپنے لیے زیادہ اہم سمجھے جانے والے حلقوں کا دفاع کرنا چاہتے ہیں، جبکہ ڈیموکریٹس ان حلقوں میں بھی مقابلہ بڑھانے کی کوشش کر رہے ہیں جنہیں رواں سال کے آغاز میں ان کے لیے مشکل یا تقریباً ناممکن سمجھا جا رہا تھا
