ایران کے سابق شاہ کے خفیہ پولیس سربراہ پر تشدد کے الزامات، امریکی عدالت نے مقدمہ آگے بڑھانے کی اجازت دے دی
امریکی ریاست فلوریڈا کی وفاقی عدالت نے ایران کے سابق شاہ محمد رضا پہلوی کی خفیہ پولیس اور انٹیلی جنس ایجنسی ساواک کے سابق سینئر عہدیدار پرویز ثابت کے خلاف انسانی حقوق کی مبینہ خلاف ورزیوں کا مقدمہ آگے بڑھانے کی اجازت دے دی ہے،عدالت نے مقدمہ روکنے کی ان کی درخواست مسترد کر دی، جس کے بعد سابق سیاسی قیدیوں کی جانب سے دائر دیوانی مقدمے میں آئندہ سال سماعت کا راستہ کھل گیا ہے
برطانوی اخبار دی گارڈین کے مطابق، پرویز ثابت پر الزام ہے کہ انہوں نے شاہ ایران کے دور حکومت میں ساواک کی سربراہی کی اور تہران سمیت مختلف مقامات پر ہزاروں سیاسی مخالفین کی گرفتاریوں اور تشدد میں ہدایات دیں یا براہ راست حصہ لیا،تین سابق سیاسی قیدیوں نے امریکی عدالت میں ان کے خلاف مقدمہ دائر کیا ہے،ثابت ان الزامات کو مسترد کرتے ہیں اور اس دعوے سے بھی انکار کرتے ہیں کہ وہ ساواک کے سربراہ تھے
مقدمے کے مدعیوں کے مطابق، انہیں ثابت کے امریکہ میں موجود ہونے کا علم اس وقت ہوا جب ان کی بیٹی نے سوشل میڈیا پر 2023 میں ایرانی حکومت کے خلاف ہونے والے ایک احتجاج کی تصویر شائع کی، جس میں ثابت بھی دکھائی دے رہے تھے،گزشتہ سال ان کے فلوریڈا کے وسطی علاقے کی ایک پُرسکون اور مہنگی رہائشی آبادی میں رہنے کی خبر بھی سامنے آئی تھی
مدعیوں نے امریکی قانون ٹارچر وکٹم پروٹیکشن ایکٹ کے تحت دعویٰ دائر کیا ہے،یہ قانون تشدد اور ماورائے قانون قتل جیسے سنگین انسانی حقوق کے جرائم کے متاثرین کو بعض حالات میں امریکی عدالتوں میں دیوانی مقدمات دائر کرنے کا راستہ فراہم کرتا ہے،اس مقدمے میں مدعیوں کا مؤقف ہے کہ شاہ کے دور میں سیاسی مخالفین کو جیلوں میں تشدد کا نشانہ بنانے کی کارروائیوں میں ثابت کا کردار تھا
ایران میں شاہی حکومت کا خاتمہ 1979 کے اسلامی انقلاب کے نتیجے میں ہوا،اس سے پہلے ساواک شاہی حکومت کا ایک اہم خفیہ ادارہ تھا، جس پر سیاسی مخالفین کی نگرانی، گرفتاریوں، تشدد اور اختلافی آوازوں کو دبانے کے الزامات طویل عرصے سے عائد ہوتے رہے ہیں
عدالت کی جانب سے مقدمہ روکنے کی درخواست مسترد ہونے کا مطلب یہ ہے کہ قانونی کارروائی آگے بڑھ سکتی ہے، تاہم اس مرحلے پر ثابت کے خلاف الزامات ثابت نہیں ہوئے،مقدمے کا آئندہ مرحلہ ان دعوؤں اور دستیاب شواہد کی عدالتی جانچ پر مشتمل ہوگا