پی ٹی آئی کا رکن قومی اسمبلی حاجی امتیاز کی بازیابی کا مطالبہ
پاکستان تحریک انصاف نے اپنے رہنما اور رکن قومی اسمبلی حاجی امتیاز کی مبینہ اغوا کے بعد فوری اور محفوظ بازیابی کا مطالبہ کرتے ہوئے واقعے پر شدید تشویش کا اظہار کیا ہے
پارٹی کے مطابق حاجی امتیاز منڈی بہاؤالدین سے پشاور میں ہونے والے ایک سیاسی اجلاس میں شرکت کے لیے سفر کر رہے تھے کہ راستے میں نامعلوم افراد نے انہیں مبینہ طور پر اغوا کر لیا
تحریک انصاف کے مرکزی میڈیا شعبے نے حاجی امتیاز کی گمشدگی کو انتہائی تشویشناک قرار دیتے ہوئے کہا کہ اس واقعے سے قانون کی حکمرانی، شہری آزادیوں اور سیاسی نمائندوں و کارکنوں کے تحفظ سے متعلق سنگین سوالات پیدا ہوئے ہیں
پارٹی نے مطالبہ کیا کہ حاجی امتیاز کو فوری طور پر تلاش کرکے بحفاظت بازیاب کرایا جائے اور مبینہ اغوا میں ملوث تمام افراد کی شناخت کرکے انہیں قانون کے مطابق انصاف کے کٹہرے میں لایا جائے
تحریک انصاف کا کہنا ہے کہ ہر شہری کی جان، آزادی اور املاک کا تحفظ ریاستی اداروں اور متعلقہ حکام کی آئینی و قانونی ذمہ داری ہے، جبکہ منتخب نمائندوں کے تحفظ کی ذمہ داری مزید اہمیت رکھتی ہے
پارٹی نے خبردار کیا کہ اگر تحقیقات میں یہ ثابت ہوتا ہے کہ واقعے میں سیاسی یا ریاستی دباؤ کا کوئی کردار تھا تو یہ جمہوری اصولوں، آئینی حقوق اور قانون کی حکمرانی پر انتہائی سنگین حملہ تصور ہوگا
تحریک انصاف کے مطابق سیاسی اختلاف رائے کو دبانے یا مخالف آوازوں کو خاموش کرنے کی کسی بھی کوشش سے جمہوری ادارے مزید کمزور، سیاسی عدم استحکام مزید گہرا اور معاشرے میں تقسیم مزید بڑھ سکتی ہے
پارٹی نے کہا ہے کہ حاجی امتیاز کی محفوظ بازیابی تک یہ معاملہ ہر آئینی، قانونی اور جمہوری فورم پر اٹھایا جاتا رہے گا
تحریک انصاف نے وفاقی حکومت، پنجاب حکومت اور تمام متعلقہ اداروں سے مطالبہ کیا کہ واقعے کا فوری نوٹس لیا جائے، حاجی امتیاز کی بازیابی کے لیے مؤثر اقدامات کیے جائیں اور عوام کو تحقیقات اور پیش رفت سے مسلسل آگاہ رکھا جائے