کینیڈا میں جنگلاتی آگ کی تباہی، ہزاروں افراد بے گھر، مقامی آبادی کی بستیاں راکھ کا ڈھیر بن گئیں
کینیڈا میں جنگلات میں لگنے والی آگ نے تباہی مچا دی ہے، جہاں ملک بھر میں 900 سے زائد مقامات پر آگ بھڑک رہی ہے۔ سب سے زیادہ متاثر مقامی آبادی کی بستیاں ہوئی ہیں، جن میں متعدد علاقوں سے ہزاروں افراد کو محفوظ مقامات پر منتقل کرنا پڑا ہے۔
تازہ اطلاعات کے مطابق 13 مقامی قبائل کی بستیاں اب بھی انخلا کے احکامات کے تحت ہیں، جس کے باعث کم از کم 2,182 افراد اپنے گھروں کو چھوڑنے پر مجبور ہو چکے ہیں۔
سب سے زیادہ تباہی نامایگوسی ساگاگن (کولنز) مقامی قبیلے کی بستی میں ہوئی، جہاں ایک ہی گھنٹے سے بھی کم وقت میں آگ نے تقریباً پوری آبادی کو اپنی لپیٹ میں لے لیا۔ تیزی سے پھیلتی آگ کے باعث مکینوں کو جان بچانے کے لیے کشتیوں کے ذریعے فرار ہونا پڑا۔
رہائشیوں کا کہنا ہے کہ انہیں اپنا سامان سمیٹنے کے لیے صرف چند منٹ ملے، جس کے بعد شعلوں نے گھروں کو اپنی لپیٹ میں لے لیا۔
انیشینابیک قوم کی گرینڈ کونسل کی سربراہ لنڈا ڈیباسیج نے بتایا کہ ابتدائی اطلاعات کے مطابق تمام رہائشی محفوظ ہیں، تاہم نقصان کے مکمل اندازے کے لیے تفصیلی جائزہ ابھی جاری ہے۔
حکام کے مطابق جنگلاتی آگ پر قابو پانے کی کوششیں بدستور جاری ہیں، لیکن شدید گرمی، خشک موسم اور تیز ہواؤں کے باعث کئی علاقوں میں صورتحال انتہائی تشویشناک بنی ہوئی ہے، جبکہ مزید علاقوں کو بھی انخلا کے لیے تیار رہنے کی ہدایت دی جا رہی ہے