صادق خان کو برطانوی ایوانِ بالا (ہاؤس آف لارڈز) کا رکن مقرر کر دیا گیا
لندن: لندن کے میئر صادق خان کو سبکدوش ہونے والے برطانوی وزیرِ اعظم کیئر اسٹارمر نے پارلیمنٹ کے ایوانِ بالا ہاؤس آف لارڈز کا رکن مقرر کر دیا ہے۔
صادق خان ان 26 نئے ارکان میں شامل ہیں جنہیں کیئر اسٹارمر نے اپنے عہدے سے روانگی سے قبل ہاؤس آف لارڈز کے لیے نامزد کیا۔ اس تقرری کے بعد صادق خان قانون سازی کے عمل میں حصہ لے سکیں گے، تاہم وہ لندن کے میئر کی حیثیت سے اپنی موجودہ ذمہ داریاں بھی جاری رکھیں گے۔
صادق خان 2016 میں لندن کے پہلے مسلمان میئر منتخب ہوئے تھے اور اس کے بعد سے وہ برطانوی سیاست کی نمایاں شخصیات میں شمار ہوتے ہیں۔ ان کی ہاؤس آف لارڈز میں شمولیت کو مستقبل میں قومی سطح کی سیاسی ذمہ داریوں کے امکان سے بھی جوڑا جا رہا ہے، اگرچہ فوری طور پر کسی وزارت کا اعلان نہیں کیا گیا۔
حکومت کے حامیوں نے صادق خان کی تقرری کو ان کی عوامی خدمات کا اعتراف قرار دیا، جبکہ ناقدین نے ہاؤس آف لارڈز میں نئی تقرریوں پر سوالات اٹھائے ہیں۔
صادق خان پاکستانی نژاد برطانوی سیاست دان ہیں اور ان کا تعلق لندن کے ایک محنت کش خاندان سے ہے۔ وہ برطانیہ میں بڑے عہدے تک پہنچنے والے نمایاں مسلم سیاست دانوں میں شامل ہیں۔