مسی ساگا میں پارکنگ قوانین پر جدید ٹیکنالوجی سے کریک ڈاؤن، خلاف ورزی پر ٹکٹ گھر پہنچے گا
مسی ساگا میں پارکنگ قوانین پر عمل درآمد کے نظام کو جدید ٹیکنالوجی سے مزید سخت اور مؤثر بنانے کا فیصلہ کیا گیا ہے نئے نظام کے تحت پارکنگ انفورسمنٹ گاڑیوں میں لائسنس پلیٹ ریکگنیشن ٹیکنالوجی استعمال کی جائے گی، جس کے ذریعے غیر قانونی طور پر پارک کی گئی گاڑیوں کی نمبر پلیٹ خودکار طور پر اسکین اور ریکارڈ کی جا سکے گی
نئے نظام کا باقاعدہ استعمال 1 اکتوبر 2026 سے شروع ہوگا اور ابتدائی مرحلے میں اس ٹیکنالوجی کو اسکول زونز میں استعمال کیا جائے گا۔ اس کا مقصد خاص طور پر اسکولوں کے آس پاس غلط پارکنگ، ڈراپ آف اور پک اپ کے دوران پیدا ہونے والی ٹریفک اور حفاظتی مسائل کو کم کرنا ہے بعد ازاں 2027 میں اس نظام کو شہر کے مزید علاقوں تک وسعت دینے کا منصوبہ ہے
نمبر پلیٹ ریکگنیشن سسٹم سے لیس انفورسمنٹ گاڑی جب کسی علاقے سے گزرے گی تو کیمرے اردگرد موجود گاڑیوں کی لائسنس پلیٹس کو اسکین کریں گے اگر کوئی گاڑی ایسی جگہ کھڑی پائی گئی جہاں پارکنگ کی اجازت نہیں، مقررہ وقت سے زیادہ کھڑی ہو یا کسی اور پارکنگ قانون کی خلاف ورزی کر رہی ہو تو اس خلاف ورزی کا ریکارڈ بنایا جا سکے گا
اس نظام میں ایک اہم تبدیلی یہ ہے کہ ہر خلاف ورزی پر گاڑی کی ونڈ اسکرین پر کاغذی ٹکٹ لگانا ضروری نہیں ہوگا جرمانے کا نوٹس گاڑی کے رجسٹرڈ مالک کو ڈاک کے ذریعے بھیجا جائے گا۔ نوٹس اس پتے پر جائے گا جو گاڑی کی لائسنس پلیٹ کے ساتھ وزارت ٹرانسپورٹ کے ریکارڈ میں درج ہوگا، اس لیے گاڑی مالکان کے لیے ضروری ہے کہ وہ اپنا موجودہ پتہ سرکاری ریکارڈ میں درست رکھیں
نئے نظام کے ساتھ پارکنگ جرمانے کی ادائیگی یا ٹکٹ کے خلاف اعتراض کے لیے بھی زیادہ وقت دیا جا رہا ہے موجودہ 15 دن کے بجائے گاڑی کے مالک کو 30 دن کی مہلت ملے گی کہ وہ جرمانہ ادا کرے یا اس کے خلاف جائزے کی درخواست دے
حکام کے مطابق اس تبدیلی کا مقصد صرف زیادہ ٹکٹ جاری کرنا نہیں بلکہ پارکنگ قوانین پر عمل درآمد کو زیادہ محفوظ، مؤثر اور منصفانہ بنانا ہے خاص طور پر اسکولوں کے قریب غیر قانونی پارکنگ کے باعث بچوں، والدین اور پیدل چلنے والوں کو درپیش خطرات کم کرنے پر توجہ دی جائے گی
اہم بات یہ ہے کہ اس نئے نظام کے آغاز کے ساتھ پارکنگ کے موجودہ قوانین یا جرمانوں کی رقم میں کوئی تبدیلی نہیں کی جا رہی۔ تبدیلی بنیادی طور پر ٹکٹ جاری کرنے کے طریقہ کار اور ٹیکنالوجی میں کی جا رہی ہے
مسی ساگا میں پارکنگ انفورسمنٹ کو ٹیکنالوجی کے ذریعے جدید بنانے کا منصوبہ نیا نہیں ہے شہر کے پارکنگ ماسٹر پلان میں پہلے ہی لائسنس پلیٹ ریکگنیشن، ڈیجیٹل چاکنگ اور موبائل ٹیکنالوجی کے استعمال کو زیادہ مؤثر پارکنگ انفورسمنٹ کے لیے شامل کیا جا چکا تھا
نئے نظام کے بعد ڈرائیوروں کے لیے پارکنگ کے نشانات، مقررہ اوقات اور دیگر پابندیوں پر عمل کرنا پہلے سے زیادہ اہم ہو جائے گا، کیونکہ انفورسمنٹ گاڑیوں کے کیمرے خلاف ورزیوں کی نشاندہی زیادہ تیزی سے کر سکیں گے