امیتابھ بچن نے جیا بچن کی ڈانٹ سے بچنے کا دلچسپ راز بتا دیا، گھر کے کاموں میں ہاتھ بٹانے کا اعتراف
بھارتی فلمی دنیا کے لیجنڈ اداکار امیتابھ بچن نے اپنی اہلیہ جیا بچن کے ساتھ ازدواجی زندگی کے دلچسپ پہلو بیان کرتے ہوئے بتایا ہے کہ وہ گھر کے کاموں میں ہاتھ بٹا کر اہلیہ کی ڈانٹ سے بچنے کی کوشش کرتے ہیں
میڈیا رپورٹس کے مطابق امیتابھ بچن نے یہ دلچسپ انکشاف مقبول ٹیلی وژن پروگرام ’’کون بنے گا کروڑ پتی 18‘‘ کے دوران کیا، جہاں گفتگو کے دوران ان کی ذاتی زندگی اور جیا بچن کے ساتھ تعلقات کا ذکر بھی آیا
امیتابھ بچن نے بتایا کہ وہ گھر کی صفائی سمیت بعض گھریلو ذمہ داریاں خود انجام دیتے ہیں،ان کے مطابق گھر کے کاموں میں مدد کرنا صرف ذمہ داری پوری کرنے کا معاملہ نہیں بلکہ اس سے گھر کا ماحول بھی بہتر رہتا ہے
اداکار نے ہلکے پھلکے انداز میں اپنی ازدواجی زندگی کا ذکر کرتے ہوئے اشارہ دیا کہ جیا بچن کی ناراضی یا ڈانٹ سے بچنے کے لیے گھر کے کاموں میں حصہ لینا ایک مؤثر حکمت عملی ہے،ان کے اس اندازِ بیان نے پروگرام کے ماحول کو مزید خوشگوار بنا دیا
امیتابھ بچن اور جیا بچن کی شادی 1973 میں ہوئی تھی اور دونوں بھارتی فلمی صنعت کی سب سے معروف شادی شدہ جوڑیوں میں شمار ہوتے ہیں،تقریباً پانچ دہائیوں پر محیط ازدواجی زندگی کے باوجود دونوں کی نجی زندگی عام طور پر میڈیا کی غیر ضروری توجہ سے دور رہی ہے
کون بنے گا کروڑ پتی میں امیتابھ بچن کی گفتگو اکثر ان کی فلمی زندگی کے بجائے ذاتی تجربات اور روزمرہ زندگی کے دلچسپ واقعات کی وجہ سے بھی توجہ حاصل کرتی ہے،جیا بچن کے حوالے سے ان کا یہ تازہ بیان بھی اسی وجہ سے سوشل میڈیا اور بھارتی تفریحی میڈیا میں دلچسپی کا باعث بن رہا ہے