راولپنڈی میں 150 سال پرانی سنیما اراضی کا تنازع، مبینہ ریکارڈ میں رد و بدل پر تین افراد گرفتار

راولپنڈی: اینٹی کرپشن حکام نے راولپنڈی میں واقع مبینہ طور پر 150 سال پرانی سنیما اراضی سے متعلق ایک مقدمے میں کارروائی کرتے ہوئے تین افراد کو گرفتار کر لیا ہے۔ گرفتار ہونے والوں میں ایک ای ٹی او، ایک انسپکٹر اور مبینہ طور پر فائدہ اٹھانے والا ملک عارف شامل ہیں۔

حکام کے مطابق یہ مقدمہ سرکاری ریکارڈ میں مبینہ رد و بدل اور جعلی دستاویزات کے ذریعے زمین کی ملکیت تبدیل کرنے کے الزامات پر درج کیا گیا ہے۔ گرفتار ملزمان سے ابتدائی تفتیش کے بعد ان کا چار روزہ جسمانی ریمانڈ بھی حاصل کر لیا گیا ہے۔

اینٹی کرپشن حکام کا کہنا ہے کہ یہ معاملہ اس وقت سامنے آیا جب اراضی کے اصل مالک بلال صادق نے متعلقہ اداروں کو درخواست دی، جس میں مؤقف اختیار کیا گیا کہ ملک عارف نے مبینہ طور پر میونسپل کارپوریشن کے بعض افسران کی ملی بھگت سے زمین پر قبضہ کیا۔

درخواست میں الزام لگایا گیا کہ جعلی پاور آف اٹارنی کی بنیاد پر تقریباً دو کنال اراضی ملک عارف کے نام منتقل کی گئی، جس کے نتیجے میں طویل عرصے سے زیرِ التوا ملکیتی تنازع دوبارہ سامنے آیا۔

حکام نے مزید کہا ہے کہ معاملے کی تحقیقات کے دائرہ کار کو وسیع کیا جا رہا ہے اور دیگر متعلقہ محکموں کے افسران کو بھی شاملِ تفتیش کرنے کی سفارش کی گئی ہے، تاکہ ریکارڈ میں مبینہ رد و بدل کے پورے نیٹ ورک کا تعین کیا جا سکے۔

یہ کیس اپنی نوعیت کے اعتبار سے اس لیے بھی اہم قرار دیا جا رہا ہے کہ یہ ایک انتہائی پرانی سمجھی جانے والی اراضی سے متعلق ہے، جس کے ملکیتی ریکارڈ پر اب سوالات اٹھائے جا رہے ہیں