ایران نواز شدت پسند کا ایوانکا ٹرمپ کے قتل کا مبینہ منصوبہ بے نقاب، فلوریڈا گھر کا نقشہ بھی برآمد۔ امریکی میڈیا کی تہلکہ خیز رپورٹ کے مطابق سابق امریکی صدر ڈونلڈ ٹرمپ کی بیٹی ایوانکا ٹرمپ ایک مبینہ ایرانی حمایت یافتہ انتقامی منصوبے کا نشانہ بننے والی تھیں۔ رپورٹ میں دعویٰ کیا گیا ہے کہ عراق سے تعلق رکھنے والے ایک شدت پسند نے جنرل قاسم سلیمانی کی ہلاکت کا بدلہ لینے کے لیے ایوانکا ٹرمپ کو قتل کرنے کی قسم کھا رکھی تھی۔ رپورٹ کے مطابق گرفتار ملزم محمد باقر سعد داؤد الساعدی مبینہ طور پر ایرانی ریوولوشنری گارڈ کور یعنی اسلامک ریوولوشنری گارڈ کور سے متاثر یا منسلک تھا۔ امریکی ذرائع کا کہنا ہے کہ اس کے قبضے سے فلوریڈا میں ایوانکا ٹرمپ کی رہائش گاہ کا نقشہ اور سوشل میڈیا پر دی گئی دھمکیوں کے شواہد بھی ملے ہیں۔ ذرائع کے مطابق ملزم کو ترکی میں گرفتار کیا گیا، جس کے بعد اسے امریکہ منتقل کر دیا گیا جہاں اس پر دہشت گردی اور بین الاقوامی حملوں کی منصوبہ بندی سے متعلق الزامات عائد کیے گئے ہیں۔ امریکی میڈیا اسے 2020 میں بغداد میں امریکی ڈرون حملے میں قاسم سلیمانی کی ہلاکت کے بعد ابھرنے والی “انتقامی مہم” کا حصہ قرار دے رہا ہے۔ یہ واقعہ ایک ایسے وقت سامنے آیا ہے جب واشنگٹن اور تہران کے درمیان کشیدگی دوبارہ خطرناک سطح کو چھو رہی ہے، اور امریکی سیکیورٹی ادارے مسلسل خبردار کر رہے ہیں کہ ایران سے منسلک گروہ سابق ٹرمپ انتظامیہ کے اہم چہروں کو نشانہ بنانے کی کوشش کر سکتے ہیں۔